Aprelniñ 20-nde Qarasuvbazar rayonınıñ Qışlav (Kurskoye) köyünde qırımtatarı Seyran Taymazovnıñ ana-babası yaşağan evge tintüv keçirmege kelgen FSB hadimleri tahqiqat tedbirlerini bitirdi. Evden bir şey almadılar, dep bildirdi «Qırım birdemliginiñ» cemaat imayecisi Mustafa Seydaliyev.
«Ev baqıldı. FSB çalıştı. Mustafa ağanıñ oğlu Seyran Taymazov aqqında soradılar, soy-soplarınıñ aytqanına köre, 2016 senesinden berli o, esas Ukrainada para qazana. Bir protokol qaldırmadılar, tizdilermi-yoqmı bilmeymiz. Evlerini baqqanlar, ana-babadan oğulları aqqında soradılar – qayda, ne içün, ne vaqıt ketti ve ilâhre. Soñra baquv bitti ve FSB hadimleri şaatlarnen beraber ketti», – dedi Seydaliyev.
Rusiye quvet müessiseleri aprelniñ 20-nde Qırımda keçirilgen tintüvlerni izaatlamay.
Daa evel berilgen malümatqa köre, FSB hadimleri salı künü, aprelniñ 20-nde, saat 14:00-da Qarasuvbazar rayonınıñ Qışlav (Kurskoye) köyünde qırımtatarı Seyran Taymazovnıñ evini tintmege keldi.
Aq qorçalayıcılarnıñ malümatına köre, Qırımda Rusiye quvetçileri üç ay içinde 126 qırımtatarını tuttı.
İnsan aqları Yuqarı komissarınıñ idaresi 2014 senesinden berli işğal etilgen Qırımda 43 insan, hususan dört qadın hırsızlanğanını qayd etti.
ABD Devlet departamenti martnıñ 30-nda 2020 senesiniñ insan aqları maruzasını derc etip, Rusiyeni Qırım yarımadasını işğal etkeni içün tenqit etti.
2020 senesiniñ insan aqları maruzasınıñ «Ukraina – Qırım» qısmında Rusiye işğal etken yarımadada «quvet qurulışlarınıñ suistimalları, insan hırsızlavları ve işkenceler» aqqında tarif etile.
Kreml, salı künü insan aqlarına riayet etüv aqqında maruzada derc etilgen ABD Devlet departamentiniñ Rusiyege qarşı hulâsalarınen razı olmağanını bildirdi.
Rusiye Tış işler naziri Sergey Lavrov işğal etilgen Qırımda insan aqlarınıñ bozuluvı aqqında laflar uydurıla, dep bildirgen edi.
