Tünevin Rusiye sıñırcılarınen Qırımğa kelgende tutılıp alınğan qırımtatar faali Edem Bekirov qanunsız silâ qullanuvı, patlayıcı maddelerniñ qanunsız berüv, satuv, saqlap tutuv ya da taşuvında (Rusiye CK-niñ 222 maddesiniñ 2-nci qısmı, 222.1 maddesiniñ 2-nci qısmı) qabaatlandı.
Bu aqta Rusiye FSB-siniñ Qırım ve Aqyarda idaresiniñ malümatından Rusiye ve Qırım matbuatı bildire.
Dava malümatına köre, bildire haberciler - Qırımda bulunıp Bekirov felânça “taksi aydayıcısına 12 killogram trotil ve 200-ge qadar 9 mm kalibrli patronlarnen çantanı berip, onı saqlamağa rica etti, şimdi o aydayıcı Karim Memetov kibi adlandırılğan gizli şaat olaraq davada iştirak ete”.
Tahqiqat, Bekirov Memetovnen 2018 senesi mayıs ayında körüşip, oña patlayıcılar ve patronlarnen çantanı berdi, o ise Qırım şimalinde Risovoye qasabası yanında çantanı saqladı ve, onı anda kimse kelip almağance, FSB idaresine kelip er şeyni tasvir etti dep iddia ete.
“Bugün (dekabr 19 - QA) FSB-niñ Qırım idaresinde Edem Bekirovnı qabaatlanğan kişi olaraq davağa celp etilgeni aqqında qararınen tanıttılar. FSB tevfiq içün köstergen şeklev ve malümatqa köre, yañı bir şey yoq. Amma bu qararnıñ daa çoq tahminleri bar”, - dep aytıp berdi Bekirovnıñ imayecisi, “Agora» halqara aq qorçalayıcı gruppasınıñ advokatı Aleksey Ladin dep yaza rusiye matbuatı “Novaya Gazeta”.
O, Bekirov öz qabaatsızlığını isbatlamaq içün dekabr 19-da sorğüdan keçmek razılıq bergenini de qayd etti.
“Bekirov, o sefer (2018 senesi mayıs ayında) Qırımda qayda olğanını adım-adım aytıp berdi. Bir geceni qızında, bir geceni apayınıñ anasında keçirdi. Soylarınen eki doğmuş tatasına köyge bardı. Yanında daima Qırımda satın alınğan sim-kartasınen telefonı bar edi. Şimdi o telefon Bekirovnıñ qızında”, - dep yaza advokatnıñ sözlerinden matbuat.
Advokatnıñ aytqanına köre, Bekirovnıñ Qırımda ne yerlerde bulunğanını bilmek içün, imayeciler telefonnıñ almaq, sim-kartanı tedqiq etmek ve qızını sorğuğa çekmek muracaa etti.
“Fikrimizce, billing, Bekirov bunı uapmağanını ve yapıp olamağanını tasdıqlamaq kerek”, - dep Ladinniñ sözlerinden yaza “Novaya gazeta”.
Herson vilâyetindeki Novoalekseyevka qasabasınıñ sakini Edem Bekirov dekabrniñ 12-nde saba Qırım kirişinde Rusiye uquq qoruyıcıları tarafından tutuldı. O, 78 anasını ve aqrabalarını ziyaret etmek içün Qırımğa ketti. Daa soñra onı Aqmescitteki Rusiye FSB binasına alıp ketkenler.
Kreml kontrolindeki Aqmescitniñ Kiyev rayon mahkemesi dekabrniñ 13-nde Bekirovnı eki ayğa apiske aldı. O, 2019 senesi fevralniñ 11-ne qadar nezaret altında qalacaq. Ukraina Tış işler nazirligi mahkemeniñ qararına qarşı «sert narazılıq» bildirdi.
Advokat Aleksey Ladinniñ bildirgenine köre, Bekirov Rusiye Ceza kodeksiniñ 222-nci maddesiniñ 2-nci qısmı ve 222.1-inci maddesiniñ 2-nci qısmı boyunca (patlayıcı madde ve patronlarnı saqlav ve berüv) şeklene. Uquqçı Lilâ Gemeci qayd etkenine köre, faal 10 kilogramm trotil ve 190 muarebe patronını taşuv ve tarqatuvda qabaatlana.
Bekirovnıñ advokatı Aleksey Ladinniñ malümatına köre, şeker hastası olğan qırımtatar faaline apiske alınğan künü – dekabrniñ 13-nden berli – tibbiy yardım kösterilmey.
Dekabrniñ 18-nde Bekirovnıñ qızı Eleonora bildirdi ki, babasına alâ daa ilâc berilmedi. Rusiyeniñ Cezalarnı eda etüv federal hızmeti Bekirovğa tibbiy yardım kösterilmegenini izaatlamay.
