Rusiye FSBsi Qırımda silâ ve patlayıcı maddelerni qanunsız saqlağanında qabaatlanğan qırımtatar faali Edem Bekirovnıñ davası boyunca tahqiqatnı yekünlendi. Eñ yaqın vaqıtta imaye dava malümatınen tanış olmağa başlaycaq, soñra onı mahkemege yollaycaqlar.
Bu aqta Bekirovnıñ advokatları Aleksey Ladin ve İslâm Velilâyev Qırım.Aqiqat mühbirine haber ettiler.
«Bugün (iyünniñ 12-nde – QA) Bekirovğa soñki qabaatlav berildi. Deñişmeler yoq, amma, tahqiqatnıñ fikirince, silâ ve patlayıcı maddelerni bergen tam künü ve saatı qayd etildi. Daa evel qabaatlav tam degil edi, cinayetniñ vaqtı ve künü belli olmağan edi», – dedi Velilâyev.
Qabaatlı olaraq celp etüv qararında Qırım ve Aqyardaki Rusiye FSBsi idaresiniñ tahqiqat bölüginiñ üyken tahqiqatçı-kriminalisti İvan Romanets «dava malümatlarını baqıp, Bekirovnıñ evelden añlaşqan bir gruppa insanlarınen silânı qanunsız şekilde saqlağanını ögrendi», dep aytıla.
Advokat Ladinniñ aytqanına köre, Bekirov qabaatını tanımadı ve daa evel tahqiqat vaqtında bergen malümatını tasdıqladı, em de kimnen ve qayda olğanını kün-kün bildirdi.
«Sorğudan soñ imaye tahqiqattan silâ ve patlayıcı maddeler berilgen vaqıtta Bekirovnıñ yanında olğan insanlarnı çağırıp sorğuğa çekmesini rica etti. Bundan ğayrı, men Memetov tahallüsli mifik şaat razı olsa, oña ve Bekirovğa nisbeten psiho-fiziologik tedqiqat (poligraf teşkerüvi) keçirmege rica ettim. Cevap bekleymiz», – dedi Ladin.
Daa evel Aqmescit mahkemesi Edem Bekirovnıñ apis müddetini daa eki ayğa uzattı. O, avgustnıñ 12-ne qadar SİZOda qalacaq.
Mayısnıñ 28-nde Bekirovnıñ advokatı İslâm Velilâyev müvekkilini Aqmescit SİZOsında ziyaret etip, sağlıq vaziyeti kritik fenalaşqanını bildirdi. Velilâyevniñ aytqanına köre, yürek, baş ağrıları, mide astı bezi problemleri, ayaqlarnıñ üyüşüvi, yüksek qan basımı ve yüksek qan şekerinden ğayrı, boğulmağa ve qannen öksürmege başladı.
Daa evel mayısta qırımtatar faali Edem Bekirov Aqmescitteki Semaşko hastahanesine teşkerüvge çıqarılğan edi.
