İşğal etilgen Qırımda Rusiye quvetçileri terakt yapmaq çağıruvlarında qabaatlanğan Saq rayonınıñ sakini tutuldı, dep bildirdi. Oña belli areketlerniñ yasaq etilmesi şeklinde sıñırlav tedbiri saylandı. Bu aqta İlk küzniñ 11-nde RF FSB Qırım idaresiniñ matbuat hızmeti bildirdi.
Rusiye mahsus hızmetleriniñ malümatına köre, 1992 senesi doğğan erkek, Telegram kanalında, olarnıñ fikrince, terakt yapmağa çağıruvlar olğan tefsirlerni yerleştirgen. Oña qarşı Rusiye Federatsiyası Ceza kodeksiniñ 205.2 maddesiniñ 2-nci qısmı boyunca cinaiy iş açıldı (internet qullanuvı ile terroristik faaliyetni kerçekleştirmek çağıruvları). Bu maddeniñ cezası yedi yılğa qadar apis cezasını belgiley.
Rusiye telükesizlik hadimleriniñ beyanatında derc etilgen tefsirlerniñ tam bir şekli berilmey ve tahqiqatnıñ fikrince, kimge qarşı çağırışlar yapılğanı aydınlatılmay.
Aq qorçalayıcılar, ilhaq etilgen Qırımda Rusiye akimiyeti farqlı fikirde olğanlarnı ve Moskvanıñ siyasetinen razı olmağanlarnı taqip etmek içün terrorizmge qarşı qanunlarnı keniş miqyasta qullana, dep qayd ete.