Rusiye FSBsiniñ hadimleri Qırımda «Noman Çelebicihan qanunsız ukrain batalyonınıñ» eki iştirakçisiniñ evinde tintüv keçire, dep bildire Rusiye kütleviy haber vastaları FSB matbuat hızmetiniñ malümatına esaslanıp.
Haber etilgeni kibi, Rusiye Ceza kodeksiniñ 208-inci maddesiniñ 2-nci qısmına istinaden (Qanunsız silâlı birleşmeni quruv ya da anda iştirak etüv) cinaiy işler açıldı.
«Qırım Cumhuriyetiniñ eki sakini qayd olğan ve yaşağan yerlerde tahqiqat ve operativ-qıdıruv tedbirleri keçirile», – dep aytıla haberde.
Qırımdaki FSB idaresiniñ malümatına köre, bu şahıslar «N.Çelebicihan batalyonı silâlı birleşmesiniñ» iştirakçileri ola.
Saba haber etilgenine köre, Aqmescitteki Borçoqraq (Fontanı) mikrorayonınıñ Emel soqağında tintüv keçirilgen edi. Qırım.Aqiqat tafsilâtlı malümat almağa tırışa.
2018 senesi noyabr ayında advokat İslâm Velilâyev bildirdi ki, Qırımda «qanunsız silâlı birleşmelerde» iştirak etüv içün cinaiy taqipler çoqlaşa bile.
2018 senesi noyabrniñ 1-nde Rusiye FSBsi bildirdi ki, Qırımda İslâm-Terek rayonınıñ sakini «Ukrainada qanunsız silâlı birleşmelerde» iştirak etkeninde qabaatlanıp yaqalandı. İslâm-Terek rayonındaki Jemçujina Krıma köyünde tükân satıcısı olıp çalışqan Dilâver Gafarov apiske alındı. Ukraina Tış işler nazirligi bunı takbih etip, Rusiyeniñ yapqanlarına qarşı narazılıq bildirdi.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
