Rusiye FSB-siniñ Qırım sıñır idaresi, yahta, keter ya da başqa gemiler ile deñiz kezintileri vaqtında özünen vesiqa almaq talabını aydınlattı. Bu aqta beyanat müessiseniñ metbuat hızmeti derc etti.
“Gemide olğan ya da gemini idare etken bütün şahışlar, deñizge çıqqanda özünen şahısnı bildirgen vesiqa ya da onıñ kopiyasını almalı ve sıñırcılar talabına onı köstermeli”, - denile beyanatta.
2018 senesi Qırım matbuatı, gemi ve qayıqlarnıñ deñizge çıquv qaideleri kerginleşkeni aqqında bildirgen edi, o vaqıt rusiye quvetçileri Rusiye FSB-siniñ №454 buyruğına atıf ete edi.
Vesiqağa köre, küçük gemi balıq tutmaq ya da raatlanmaq niyetinen deñizge çıqacaq olsa, eñ azından eki saat evel sıñırcılarğa qaytuv vaqtını bildirmek kerek. Toqtav yerine qaytqan soñ da haber etmek kerek. Gemi vaqtında qaytıp yetiştirmese, kapitan telefon ya da radio vastasınen keçikkeniniñ sebebini añlatmalı. Gece deñizge tek mahsus bericinen çıqmaq mümkün, akvalangnen dalmaq tek kündüz mümkün.
