Rusiye FSBsiniñ Tahqiqat idaresi Keriç boğazında zapt etilgen 24 ukrainalı deñizcini apiste tutuv müddetini küzge qadar uzatmağa rica ete.
Bu aqta Rusiye kütleviy haber vastaları Moskvanıñ Lefortovo mahkemesiniñ matbuat kâtibi Kseniya Pervovlasenkonıñ malümatına esaslanıp bildire.
«Mahkemege tahqiqatnıñ 24 qabaatlanğan kişini apiste tutuv müddetini üç ayğa uzatmaq muracaatı keldi – 2019 senesi oktâbrniñ 24-ne ve 26-na qadar», – dep ayttı matbuat kâtibi.
Onıñ bildirgenine köre, mahkeme işbu muracaatlarnı çarşenbe künü, iyülniñ 17-nde, baqacaq.
Moskvanıñ Lefortovo mahkemesiniñ saytında oturışuv haberi daa yoq.
Bundan evel FSB 24 ukrainalı deñizcini Rusiye Ceza kodeksiniñ 322 maddesiniñ 3-ünci qısmına istinaden (Rusiye devlet sıñırından qanunsız keçüv) qabaatladı.
2018 senesi noyabrniñ 25-nde Rusiyeniñ sıñır gemileri Odesa limanından Azaq deñizinde Mariupolge keçken Ukraina Arbiy deñiz quvetleriniñ gemilerine qarşı «açıq istilâiy areketler» kerçekleştirdi. Rusiyeniñ «Don» sıñır kateri Ukraina Arbiy deñiz quvetleriniñ «Yañı Qapu» reyd buksirine aselet çarptı.
Rusiye FSBsi Ukraina gemilerine qarşı silâ qullanğanını tasdıqladı, mında berilgen malümatqa köre, üç Ukraina cenk gemisi noyabrniñ 25-nde «Rusiye devlet sıñırından qanunsız keçti».
Aqmescit ve Keriç mahkemeleri 24 Ukraina deñizcisini apiske aldı. Olar 2019 senesi yanvarniñ 25-ne qadar apiste qalacaqlar. Ukraina deñizcileri 6 yılğa azatlıqtan marum qala bile. Qırım yalısında zapt etilgen Ukraina deñizcileri noyabrniñ 27-nde Rusiye Ceza kodeksiniñ 322-nci maddesiniñ 3-ünci qısmına istinaden (sıñırdan qanunsız keçiş) qabaatlandı. Esir alınğan Ukraina askerleri Moskvağa avuştırıldı.
Qırım Muhtar Cumhuriyetiniñ prokuraturası Rusiye FSBsi tarafından zapt etilgen ukrain deñiz askerlerini cenk esiri dep tanıdı.
Rusiyeniñ Keriç boğazında yapqanlarını bir sıra Avropa memleketi ve ABD tenqit eteler. NATO, vaziyetni ve Keriç boğazındaki adiselerni diqqatnen közetkenini bildirip, ağır-sabırlı olmağa ve vaziyetniñ daa beterine yol açmamağa çağırdı.
