Qırımdaki Rusiye FSBsiniñ sıñır idaresi Qırım ve Aqyarnıñ memuriy sıñırında Poltava vilâyetiniñ sakininden qomşu Rusiyede «yasaqlanğan» edebiyatnı alğanını bildirdi.
Bu aqta müessiseniñ matbuat hızmeti haber ete.
Berilgen malümatqa köre, Ukraina vatandaşınıñ bir qaç kitabı alındı, «olarnıñ tış körünişi ve mündericesi ekstremist ola».
Haberge köre, er adam qırımlı sıñırcılarğa «yük ve yolcularnı taşıy», dep bildirdi. Edebiyat olğan cemidannı erkek para alıp ketirgen edi, «kitaplarnıñ mündericesine ise qulaq asmadı».
Müessiseniñ qayd etkenine köre, sıñırcılar kitaptı ekspertizağa yolladı. Ukrainalınıñ adı ve soyadı haberde aytılmay, ne olacağı da belli degil.
Bu afta ilhaq etilgen Qırımnıñ memuriy sıñırındaki Rusiye keçiş noqtasında eki Ukraina vatandaşınıñ tutulması aqqında endi haber etilgen edi. Rusiye FSBsiniñ sıñır müessisesiniñ malümatına köre, tutulğanlar «federal ve devletlerara qıdıruvda» bulunğan edi.
Ukraina Devlet sıñır hızmeti Qırımnıñ memuriy sıñırında FSB tarafından tutulğan Ukraina vatandaşlarınıñ kim olğanını belgilemek imkânsız, dep bildirgen edi. Rusiye tarafı olarnıñ şahsiy malümatını aydınlatmay. Ukrainalı sıñırcılar «işğalcilernen bağ tutmağanını» qayd ete.
2014 senesiniñ başında Qırım Rusiye tarafından ilhaq etilgen soñ Ukrainanıñ qıtadaki qısmı ile yarımada arasında şeklen memuriy, lâkin kerçekte aqiqiy olğan sıñır keçti. Herson vilâyetinde Qırım ile memuriy sıñırda üç kiriş/çıqış kontrol noqtası çalışa – «Kalançak», «Çonğar» ve «Çaplınka».
