Qırımdaki FSB idaresiniñ hadimleri Qırımğa ketken Ukraina vatandaşından silâ tutıp aldılar dep avgustnıñ 13-ünde haber etti muessiseniñ matbuat hızmeti.
Rus quvetçilerniñ malümatına köre, rusiye sıñırcıları, Qırım tarafından “Armânsk” kırış-çıqıç noqtasında, Ford maşnasınıñ baquvı devamında aydayıcınıñ kürsüsi tübünde “çeşiti belgisiz olğan pıştav, pıştav magazini ve 9 milimetr kalibrli sekiz patron” taptı.
Ukrain vatandaşlığınen qadın, pıştav babasına ait olğanını ve babası onı özüni qorçalamaq maqsadınen yanında taşığanınınen añlattı dep haber ete FSB hadimleri.
Rusiye sıñırcıları silâ ve arbiy yedeklerni ekspertiza keçirmek içün alğanlarını da qoştı FSB.
Ukrainiñ Devlet sıñır hızmeti endi bir qaç kere bildirgenine köre, Qırım memuriy sıñırında tutılğan Ukraina vatandaşlarınıñ şahsiyetini bilmege imkân yoq, çünki rusiye tarafı bu malümatnı açıqlamay. Ukrain sıñırcıları da ise “işğalcilernen bağ” tutmağanlarnı beyan ete.
2014 senesiniñ başında Qırım Rusiye tarafından ilhaq etilgen soñ Ukrainanıñ qıtadaki qısmı ile yarımada arasında şeklen memuriy, lâkin kerçekte aqiqiy olğan sıñır keçti. Herson vilâyetinde Qırım ile memuriy sıñırda üç kiriş/çıqış kontrol noqtası çalışa – «Kalançak», «Çonğar» ve «Çaplinka».
Halqara teşkilâtlar Qırımnıñ işğal ve ilhaqını qanunsız dep tanıdı ve Rusiyeniñ areketlerini takbih etti. Ğarbiy memleketler bir sıra iqtisadiy cezalarnı kirsetti. Rusiye işğalni red ete ve öz amellerini “tarihiy adaletniñ ğayrıdan tiklevi” dep adlandıra. Ukrainanıñ Yuqarı Şurası, 2014 senesiniñ fevralniñ 20-sini Rusiye tarafından Qırım ve Aqyar vaqtıncalıq işğalniñ başlanuv künü dep resmiy olaraq ilân etti.
