Qırımdaki FSB hadimleri, «Asker» cemaat birleşmesiniñ reisi Lenur İslâmovnıñ «şahsiy muafızı» olğan qırımlı tutuldı, dep israr ete. Bu aqta Qırım kütleviy haber vastaları FSB matbuat hızmetiniñ malümatına esaslanıp bildire.
FSB idaresiniñ malümatına köre, 1994 senesi doğma şübheli tutuldı. Rusiye uquq qoruyıcıları adını aydınlatmay.
Rusiye uquq qoruyıcıları bildire ki, qırımlı 2016 senesi «N.Çelebicihan batalyonına kirip», anda «mahsus azırlıq kördi, şu cümleden silâ qullanmasını ögrendi».
«O, qanunsız silâlı birleşmeniñ komandanı L.E. İslâmovnıñ şahsiy muafızı olıp, bergen vazifelerini eda etmek kerek edi», – dep yaza FSBniñ malümatını «Krıminform».
Haber etilgeni kibi, FSB Rusiye Ceza kodeksiniñ 208-inci maddesiniñ 2-nci qısmına istinaden (qanunsız silâlı birleşmede iştirak etüv) cinaiy iş açtı. Şübheli olğan kişige sıñırlav tedbiri saylanmaqta.
Qırım.Aqiqat Lenur İslâmovdan izaat almağa tırışa.
Yanvarniñ 23-nde haber etilgenine köre, Qırımda «Noman Çelebicihan ukrain batalyonınıñ iştirakçileri» qayd olğan adreslerde tintüvler keçirildi. Daa soñra belli oldı ki, Qırımdaki Rusiye FSBsi «Asker» cemaat birleşmesiniñ vekili Evelina Arifova ve qırımlı Bekir Abultarovnıñ evlerini tintti.
2018 senesi noyabr ayında advokat İslâm Velilâyev bildirdi ki, Qırımda «qanunsız silâlı birleşmelerde» iştirak etüv içün cinaiy taqipler çoqlaşa bile.
Ukraina uquq qoruyıcı organları erkânında qırımtatar batalyonını quruv munaqaşası 2016 senesinden berli devam ete. Qırımtatar Milliy Meclisi, bu meselenen bağlı bütün malümat Ukraina prezidenti Petro Poroşenko ve İç işler naziri Arsen Avakovğa berildi, dep qayd etken edi.
Ukraina İç işler nazirligine ait Ukraina Milliy gvardiyası, olarnıñ qurulışında «qırımtatar batalyonınıñ» qurulması aqqında beyanatlar şimdilik qanun seviyesinde tasdıqlanmağan beyanatlar olıp qla, dep qayd etken edi.
«Asker» cemaat teşkilâtınıñ yolbaşçısı Lenur İslâmov Noman Çelebicihan «qırımtatar batalyonına» arbiy bölük nomerasını bermege talap etken edi.
