Rusiye nezaretindeki Qırımnıñ İslâm Terek rayon mahkemesi, qıta Ukrainada “Noman Çelebicihan batalyonında azalıq etken”inde qabaatlanğan Edem Kadırovğa qarşı üküm çıqarğanı aqqında Rusiye FSBsi bildire. Quvetçilerge köre, mahkemelengen qırımlı is adamı Lenur İslâmovnıñ “şahsiy qaravulı” edi.
“Krıminform” matbuatı FSBge esaslanıp haber etkeni kibi, Kadırovnı 4 yıllıq apis cezasına ve 1 yıllıq azatlıq sıñırlavına mahküm ettiler.
«Asker» cemaat birleşmesiniñ başı Lenur İslâmov, Qırımda rusiye quvetçileri “İslâmovnı qaravulı” dep yaqalağan adamnı tanımağanını iddia etti.
Kreml nezaretindeki Aqmescitniñ Kiyev rayon mahkemesi, yanvarniñ 23-ünde qırımlını eki ayğa apis etti. FSB, Rusiye Ceza kodeksiniñ 208-inci maddesiniñ 2-nci qısmına istinaden (qanunsız silâlı birleşmede iştirak etüv) cinaiy iş açtı.
Ukraina uquq qoruyıcı organları erkânında qırımtatar batalyonını quruv munaqaşası 2016 senesinden berli devam ete. Qırımtatar Milliy Meclisi, bu meselenen bağlı bütün malümat Ukraina prezidenti Petro Poroşenko ve İç işler naziri Arsen Avakovğa berildi, dep qayd etken edi.
Ukraina İç işler nazirligine ait Ukraina Milliy gvardiyası, olarnıñ qurulışında «qırımtatar batalyonınıñ» qurulması aqqında beyanatlar şimdilik qanun seviyesinde tasdıqlanmağan beyanatlar olıp qla, dep qayd etken edi.
«Asker» cemaat teşkilâtınıñ yolbaşçısı Lenur İslâmov Noman Çelebicihan «qırımtatar batalyonına» arbiy bölük nomerasını bermege talap etken edi.
