Rusiye Federal telükesizlik hızmetiniñ hadimleri «subet» içün tutulğan qırımtatar faali Lenora Dülberni çıqarıp yiberdi, dep bildirdi Qırımtatar Milliy Qurultayı Merkeziy saylav komissiyasınıñ reisi Zair Smedlâyev.
«Lenora Dülber bir qarar, evine kete», – dep bildirdi Smedlâyev Facebookta.
Onıñ malümatına köre, FSB, «aynı subet içün» qırımtatar milliy areketiniñ faali Nariman Celâlnı tuttı.
Qırım.Aqiqat Dülber ve Celâlnıñ izaatlarını almağa tırışa.
Bundan evel Smedlâyev, Qırım ve esas Ukraina arasındaki memuriy sıñırda Rusiye uquq qoruyıcıları Lenora Dülberni tutıp aldı, dep bildirgen edi.
Rusiye küç hızmetleri bunı izaatlamay.
2014 senesiniñ başında Qırım Rusiye tarafından ilhaq etilgen soñ Ukrainanıñ qıtadaki qısmı ile yarımada arasında şeklen memuriy, lâkin kerçekte aqiqiy olğan sıñır keçti. Herson vilâyetinde Qırım ile memuriy sıñırda üç kiriş/çıqış kontrol noqtası çalışa – «Kalançak», «Çonğar» ve «Çaplınka».
