''Çonğar ve Qırım yarımadası arasındaki avtomobil ve demiryol köpürleriniñ qoruvına ayrı diqqat ayırıla. Bu yöneliş Qırımdaki ordu gruppirovkasına qol tutmaqnı ve Herson ve Zaporojjâ yönelişlerinde gruppirovkalarnı tıştan temin etmekni temin ete'', dep haber ete Ukrayina milliy tirenüv merkezi.
Herson vilâyetiniñ sol yalı qısmı zapt etilgen soñ, rusiyeliler Qırım ve Herson vilâyeti arasındaki memuriy sıñırdaki keçiş noqtasını yoq etmedi, dep qayd eteler Ukrayina milliy tirenüv merkezinde.
''Bu obyektler Rusiye mahsus hızmetleri tarafından vatandaş ealisini filtratsiya tedbirlerinden keçirmek içün qullanıldı. Şimdiki vaqıtta ''Çonğar'' keçiş noqtasını qoşma olaraq, rentgen qullanuvı ile avtomobillerni skan etüv ve nezaret etüv sisteması ile donatqanlar. Zaporojjâ ve Herson vilâyetleriniñ, em ukrayin, em de rusiyelilerniñ qayd nomerası olğan maşinalarnı diqqatnen baqıp çıqalar", - dep qoştılar milliy tirenüv merkezinde.
Yanvarniñ 25-nde Rusiye kontrolindeki Qırım yolbaşçısı Sergey Aksönov Qırım ve Herson vilâyetiniñ işğal etilgen qısmı arasındaki memuriy sıñırda "mahsus kiriş-çıqış rejimi " kirsetile, dep buyruq çıqardı. Vesiqağa binaen, Qırımnıñ şimalinde keçüv rejimi Rusiye Federatsiyasınıñ devlet sıñırından keçüv rejimi ile teñ kele.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
