Erkek Pskov civarında tutuldı. Qırımlı 2022 senesi avgust-dekabr aylarında Qırımda «Rusiye Silâlı quvetleriniñ bölük mevzileri, askerleri ve arbiy tehnikasınıñ foto ve videolarını yapqan eken».
Bundan ğayrı, Rusiye uquq qoruyıcıları bildirgenine köre, mahsus programma yardımınen erkek Rusiye tehnikası ve askerleriniñ bulunğan koordinatlarnı taptı. Tutulğanğa qarşı «devlet hainligi» maddesine istinaden cinaiy dava açıldı.
Sentâbr soñunda Rusiye kütleviy haber vastaları Keriç sakini «casuslıq» şübhesinen tutuldı, dep bildirgen edi. 45 yaşında erkek Ukrayına Mudafaa nazirliginiñ Baş istihbarat idaresi vazifesine köre «mahsus arbiy operatsiya (Rusiye Ukrayınağa qarşı cenkni böyle adlandıra – QA) keçirilgen yerde arbiy tehnika areketini foto ve videoğa çıqarıp, bu malümatnı gizli bağ kanallarından reberine yollağan eken».
Qırım ve Aqyarda 2014 senesinden başlap eñ az 16 Ukrayına vatandaşı «casuslıq» ve «diversiyalarda» qabaatlanıp mahküm etildi. 2015 senesi terakt azırlanuvını teşkil etüv qabaatı boyunca Ruiye mahkemesi Oleg Sentsovnı 20 yılğa üküm etti. Rusiye uquq qoruyıcıları «Hizb ut-Tahrir» teşkilâtınıñ vekillerini böyle «diversiyalarda» qabaatlağan ediler. Rusiyeniñ Ukrayınağa qarşı büyük istilâsından soñ yarımadada cenkke qarşı çıqqanlar taqip etile.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
