FSB demiryolnı patlatqanından «şübheli» sayılğan Aqmescit sakinini tuttı, dep bildirdi Qırımnıñ Rusiye yolbaşçısı Sergey Aksenov.
«Ukrayına mahsus hızmetleriniñ emrinen Qırımnıñ demiryol naqliyatı obyektinde diversion-terroristik aktnıñ kerçekleştirilüvine alâqası olğan 1998 senesi doğma Rusiye vatandaşınıñ qanunsız faaliyeti toqtatıldı», – dep bildire Rusiye kütleviy haber vastaları FSB malümatına esaslanıp.
Berilgen malümatqa köre, 2022 senesi fevral ayında Aqmescit sakini Odesağa barıp, anda «Ukrayına Mudafaa nazirligi Baş istihbarat idaresiniñ hadimleri tarafından celp etildi, istihbarat-diversion azırlıq kördi, soñra Qırım Cumhuriyetine yollanıldı».
Fevralniñ 23-nde aqşam Qırımnıñ Bağçasaray rayonında kimligi belli olmağan insanlar demiryolğa zarar ketirdi. Neticede trenlerniñ areketi toqtatıldı.
Mayısnıñ 18-nde Aqmescit rayonında bir qaç vagon relsten çıqqan edi. «Qırım demiryolları» müessisesi qaza sebebi – «alâqası olmağan şahıslarnıñ demiryol naqliyatınıñ işine kirişüvi» oldı, dep bildirdi. Soñra Qırımnıñ Rusiye akimiyeti demiryolda telükesizlik tedbirleri sertleşecek, dep ilân etti.
Qırımnıñ Rusiye parlamentiniñ spikeri Vladimir Konstantinov adiseni «patlatuv» dep adlandırdı ve Ukrayınanı qabaatladı.
Ukrayına istihbaratı Rusiye arbiyleri bu demiryolnı silâ taşımaq içün qullandı, dep bildirdi. Ukrayına Mudafaa nazirliginiñ Baş istihbarat idaresiniñ spikeri Andriy Yusov «demiryolu dayanamayıp, yoruldı ve vaqtınca çalışmay», dep ayttı.
İyünniñ 11-nde Qırımnıñ Rusiye yolbaşçısı Sergey Aksenov Qırımnıñ İslâm Terek rayonında demiryol zarar kördi, dep bildirdi. Bir qaç saat devamında trenler areket etmey edi.
İyünniñ soñunda belli olğanına köre, Aqmescitte Rusiye uquq qoruyıcıları 33 yaşında Kirill Barannikni tuttı. Advokatı Barannik demiryolnı patlatqanını aytsın dep, işkencege oğratıldı, dep bildirdi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
