Rusiye uquq qoruyıcıları Qurman rayonınıñ Danilovka köyünde Elmira Abultarovanıñ evinde tintüv keçirdi. Onıñ oğlu «qanunsız silâlı birleşmede» iştirak etkeninden şübheli sayıla. Bu aqta Elmira Abultarova qırımtatar faali Zair Smedlâyev derc etken videoda tarif etti.
«Saba saat altı buçuqta evimiz tintildi. Tintüv aqqında qarar kösterildi, amma kopiyası qaldırılmadı. Onı elektron taşıyıcığa bile fotoğa çıqarmağa izin berilmedi. Bayağı nezaketli yanaştılar. Qararda oğlumız Bekir Abultarov Rusiyede yasaqlanğan bir teşkilâtnıñ azası ola, dep yazılğan edi. Şu sebepten tintüv keçirmege kelgenler», – dedi Abultarova.
Onıñ aytqanına köre, Rusiye uquq qoruyıcıları «oğlunıñ bir de bir teşkilât, silâ ve narkotiknen bağlı olğanını isbatlaycaq» bir şey qıdırdılar. Uquq qoruyıcılar eki cep telefonı ve iş bilgisayarını alıp ketti.
Saba haber etilgenine köre, Aqmescitteki Borçoqraq (Fontanı) mikrorayonınıñ Emel soqağında tintüv keçirilgen edi. Daa soñra belli oldı ki, Qırımdaki Rusiye FSBsi hadimleri «Asker» cemaat birleşmesiniñ komandan vekili Evelina Arifovanıñ ana-babası yaşağan evde tintüv keçirdi.
Rusiye FSBsiniñ hadimleri Qırımda «Noman Çelebicihan qanunsız ukrain batalyonınıñ» eki iştirakçisiniñ evinde tintüv keçire, dep bildirdi Rusiye kütleviy haber vastaları yanvarniñ 23-nde saba.
2018 senesi noyabr ayında advokat İslâm Velilâyev bildirdi ki, Qırımda «qanunsız silâlı birleşmelerde» iştirak etüv içün cinaiy taqipler çoqlaşa bile.
Ukraina uquq qoruyıcı organları erkânında qırımtatar batalyonını quruv munaqaşası 2016 senesinden berli devam ete. Qırımtatar Milliy Meclisi, bu meselenen bağlı bütün malümat Ukraina prezidenti Petro Poroşenko ve İç işler naziri Arsen Avakovğa berildi, dep qayd etken edi.
Ukraina İç işler nazirligine ait Ukraina Milliy gvardiyası, olarnıñ qurulışında «qırımtatar batalyonınıñ» qurulması aqqında beyanatlar şimdilik qanun seviyesinde tasdıqlanmağan beyanatlar olıp qla, dep qayd etken edi.
«Asker» cemaat teşkilâtınıñ yolbaşçısı Lenur İslâmov Noman Çelebicihan «qırımtatar batalyonına» arbiy bölük nomerasını bermege talap etken edi.
