Rusiye FSBsi, onıñ bildirgenine köre, içtimaiy ağdaki saifesinde «terrorizmge çağırğan» 26 yaşında Canköy sakinine qarşı cinaiy dava açtı.
«Er adam içtimaiy ağdaki saifesinde terror faaliyetine çağırğan ve terrorizmni aqlağan video levhalarını sıñırsız serbest açıq irişimde yerleştirdi», – dep bildire müessise malümatını akimiyetke yaqın «Krıminform» saytı.
Qayd etilgenine köre, Rusiye quvetçileri «elektron malümat taşıyıcıları ve esap tehnikasını» aldı.
«Sorğu vaqtında şübheli qabaatını tanıdı ve yapqanlarına peşman etti. Oña qarşı sıñırlav tedbiri olaraq ketmemezlik seneti saylandı».
Erkekni beş yılğa qadar apis cezası bekley.
Cankoyliniñ adı ve soyadı aytılmay.
Bu malümatnı tasdıqlağan diger menbalar da yoq.
Daa evel Kreml kontrolindeki Aqyarnıñ Gagarin rayon mahkemesi yerli sakinge içtimaiy ağda qaldırğan «aşalayıcı tefsirleri» içün 10 biñ ruble para cezasını berdi.
İşğal etilgen Qırımda içtimaiy ağda yazılğanlar içün ilk sefer cezalamaylar. 2018 senesi mayısnıñ 4-nde Kreml kontrolindeki Aqyarnıñ Gagarin rayon mahkemesi ekstremizmde qabaatlanğan İgor Movenkonı 2 yılğa üküm etti. Aqyarlı «VKontakte» Rusiye içtimaiy ağında «Qırım – Ukrainadır» gruppasında qaldırğan bir qaç tefsir içün qabaatlandı.
Ukraina Tış işler nazirligi, Aqyardaki Rusiye mahkemesiniñ qararına qarşı narazılıq bildirip, Movenkonıñ azat etilüvi içün küreşe, dep ayttı. İyünniñ 26-nda Aqyar şeer mahkemesi Movenkonıñ ükmüni şartlı cezağa deñiştirip, onı der-demez azat etmege qarar berdi.
