Azaq deñizinde Veselo-Voznesensk Rusiye meskün yeri yaqınlarında FSB balıq tutqan eki Ukraina vatandaşını tutıp aldı, dep bildire Ukrainanıñ birleşken quvetler operatsiyasınıñ ştabı.
Bu malümatqa köre, ukrain balıqçıları Donetsk vilâyetiniñ Holodnoye qasabasından çıqıp Taganrog körfezine kelgenler.
Ukraina komandanlığı bildire ki, Rusiye FSB sıñır idaresi ukrainalılarnıñ suv biologik resurlarını alıp, olarğa qarşı memuriy işler açtı.
Ukraina sıñırcıları balıqçılarğa Azaq deñizindeki zor bir telükeli vaziyet olğanını hatırlata. Şu sebepten deñizge çıqmaq içün tek belgilengen noqtalarnı qullanmaq kerek ve yalıdan uzaq ketmemek kerek.
Rusiye Federal telükesizlik hızmetiniñ mezkür habernen bağlı bir de bir izaatı şimdilik yoq.
Azaq deñizi soñki vaqıtları Rusiye uquq qoruyıcıları yapqan provokatsiyalarnıñ yeri olğan. Sıñırcılar Ukraina limanlarına ketken ve andan kelgen gemilerni tuta.
Mayısnıñ 3-nde Ukraina Devlet sıñır hızmeti, «rusiyeliler Keriç boğazından keçken gemilerni baqıp sert bir şekilde tuta», dep bildirgen edi. Hızmetniñ malümatına köre, aprelniñ 30-ndan başlap Rusiye mahsus hızmetleri er kün gemilerni toqtata ve ekipajnıñ kimligini ögrene.
Ukraina infrastruktura naziri Vladimir Omelânnıñ bildirgenine köre, bu yıl aprelniñ soñundan başlap iyül ayına qadar Rusiye sıñırcıları Azaq deñizinde aman-aman 100 ukrain gemisini tuttı.
Sentâbrniñ 6-nda Ukrainanıñ milliy havfsızlıq ve mudafaa şurası Azaq deñizindeki arbiy-deñiz imayesini quvetleştirmege qarar aldı.
