İşğal etilgen Qırımda FSB hadimleri aşhanelerden birinde aşçı olıp çalışqan 43 yaşında Aqyarlı qadınnı devlet hainliginden şübheli sayıp tuttı.
Mahsus hızmetlerniñ malümatına köre, 2023 senesi sentâbr ayında yarımada sakini WhatsApp messencerinde Ukrayina Mudafaa nazirligi Baş istihbarat idaresinen bağlanıp, Rusiye arbiy obyektleri aqqında malümatnı berip başladı.
Rusiye tahqiqatınıñ malümatına köre, yaqalanğan qadın Aqyar körfezinde Qara deñiz flotunıñ gemi fotoresimlerini toplap, Ukrayina tarafına yollağan, bu fotoresimler ise bazağa darbeler içün qullanıla bile. Bundan ğayrı, FSB «SVO askerlerini zeerlemek niyeti bar edi», dep bildire.
Qırımlı qabaatını tanıdımı aytılmay.
Kerçekleşmegen «zeerlev suiqastı» qabaatlavı – Rusiyede taqip usullarından biri ola, dep qayd ete «Pervıy otdel» aq qorçalayıcı leyhası.
2024 senesi «Pervıy otdel» leyhası Rusiyede Ukrayinağa qarşı büyük istilâ başlağan soñ 792 insan devlet hainligi, casuslıq ve çetel devletinen gizli işbirligi cinaiy davalarınıñ mabüsleri oldı.
Aq qorçalayıcılarnıñ fikirince, bir çoq dava FSB provokatsiyalarınen bağlı edi, olarnıñ qurbanı ise içtimaiy ağlarnıñ (hususan VKontakte ve Telegram) cenkke qarşı ve muhalifet saifeleriniñ iştirakçileri olğan qullanıcıları ola.