Rusiyeniñ Federal telükesizlik hızmeti (FSB) Qırımda Rusiye arbiy aviatsiyasınıñ uçuşları aqqında Ukraina mahsus hızmetleri içün malümat toplağan Aqmescit sakini tutuldı, dep bildire.
Bu aqta Rusiye kütleviy haber vastaları FSB Cemaat bağları merkezine esaslanıp haber ete.
«Rusiye Federal telükesizlik hızmeti Ukraina istihbarat organlarınıñ menfaatları içün areket etken Aqmescit sakininiñ qanunsız faaliyeti qayd etilip toqtatıldı. Uzun bir müddet devamında Rusiye vatandaşı mahsus antenna ve alıcı donatmaları vastasınen Ukraina mahsus hızmetlerniñ vazifesinen Rusiye arbiy aviatsiyasınıñ uçuşları aqqında malümat toplağan edi», – dep bildire FSB haberini TASS agentligi.
Rusiye mahsus hızmetleri bu malümat «Rusiye Federatsiyasınıñ telükesizligine qarşı qullanılacaq edi», dep bildire. Qayd etilgenine köre, Rusiye Ceza kodeksiniñ 275-inci maddesine istinaden («devlet hainligi») cinaiy dava açıldı.
Er kişi apiske alındı, 20 yılğa qadar apiske alınması mümkün.
Apiske alınğannıñ adı ve soyadı haberde yoq, onıñ açıq izaatları da yoq.
Rusiye FSBsiniñ saytında bu malümat şimdilik yoq. Ukraina mahsus hızmetleri bu malümatnı şimdilik izaatlamadı.
Aprel ayında FSB Aqyar sakinini şübheli sayıp tuttı. Keçken afta onıñ apis cezası uzatıldı ve o, Qırımdan Moskvağa etap etildi.
İyünniñ başında Rostov-na-Donu (Rusiye) Cenübiy okrugınıñ arbiy mahkemesi «devlet hainliginde» qabaatlanğan Rusiye arbiyini üküm etti. 2020 senesi qadın «Ukraina istihbarat-diversion gruppasınıñ» iştirakçisi olaraq Qırımda FSB hadimleri tarafından tutulğan edi.
Ukraina Mudafaa nazirliginiñ baş istihabart idaresi bu FSB ile alâqaları bar olğanından şübheli sayılğan Ukraina telükesizlik hızmetiniñ general mayorınıñ Ukraina quvetçileri tarafından yaqalanmasına cevap oldı, dep bildireler.
