İşğal etilgen Qırımda patlayıcı maddeni alıp saqlağanından şübheli sayılıp apiske alınğan qırımlı Denis Kaşuknı yarımadada qalğan ömür arqadaşı ve balasınen şantaj ete bileler. Bu aqta Kaşuknıñ eki doğmuş qız qardaşı Yelena Güseynova Qırım.Aqiqatqa tarif etti.
Onıñ malümatına köre, yanvarniñ 12-nde Kaşuk 2019 senesi dekabr ayında Qırımdan Kyivge köçken anasına SİZOdan ilk sefer telefrn etti.
«O, (Kaşuk – QA) özüni qorçalamadı, mustaqil advokatı yoq ve bu «apayı yahşı» olğanını isbatlamaq içün berilgen FSB telefonı olğandır. Onı ömür arqadaşı ve balasınen şantaj etmeleri mümkün», – dep tüşüne Kaşuknıñ qız qardaşı.
Onıñ aytqanına köre, Kaşuk kamerada kimnen oturğanını, tutuv şaraitlerini tarif etip olamay.
«Onı qorçalağan mustaqil advokatı yoq. Vaziyetni daa beter etken tayinlengen advokatı bar. Mahkemede bir ricası oldı, qorantasınıñ Qırımdan ketmesini istedi. Qorantanıñ bir qısmı – anası ve onıñ aqayı ketkenler. Apayı ve oğlu qalğanlar. Olar şantaj obyekti ola bile. Ve, ne yazıq ki, bunı añlap olamaylar. Mustaqil advokat ve mustaqil yardım almağanınıñ sebebi Qırımdan ketmege razı olmağan ömür arqadaşı içün qorqu ola», – dep ayta Güseynova.
Rusiye FSBsi Aqmescit sakini Denis Kaşuknı silâ satın alğanından ve saqlağanından şübheli sayıp tuttı. Denis Kaşuknıñ ömür arqadaşı Olga Qırım.Aqiqatqa izaat berip, dekabrniñ 17-nden berli bağda olmağanını ve evlerinde tintüv keçirilgenini bildirdi.
Advokat Nazim Şeyhmambetov, FSB Kaşuknı eki madde – Rusiye Ceza kodeksiniñ 222-nci ve 222.1-incisine istinaden («qanunsız satın aluv, satış, saqlap, silâ, onıñ esas parçalarınıñ taşıması») – şübheli saya, dep bildirdi.
Rusiye kontrolindeki Aqmescitniñ Kiyev rayon mahkemesi dekabrniñ 20-nde Aqmescit sakini Denis Kaşuknıñ sıñırlav tedbirini belgilep, onı 2020 senesi fevralniñ 18-ne qadar SİZOğa aldı.
Kaşuk, mustaqil imayeden vazgeçti. Bu malümatnı Qırım.Aqiqatqa advokat Nazim Şeyhmambetov tasdıqladı. O, aqmescitliniñ imayecilerinden biri edi.
Apiske alınğannıñ tuvğanları Kaşuknıñ mustaqil advokatlardan vazgeçkenini tasdıqladı, amma bunı yaqınlarınıñ telükesizligi içün yapmağa mecbur edi, dep bildire.
Qırım Muhtar Cumhuriyetiniñ prokuraturası Aqmescit sakini Denis Kaşuknıñ tutuluvı ve qanunsız aldı azatlıqtan marum etilüvi sebebinden Ukraina Ceza kodeksiniñ 146-ncı maddesiniñ 1-inci qısmına istinaden (qanunsız alda azatlıqtan marum etüv) cinaiy tahqiqat başlattı.
