Rusiye Federatsiyasınıñ Federal telükesizlik hızmeti Qırımda Rusiye memurlarına qarşı suiqast azırlamağa istegen casuslarnı tapqanını bildire, dep haber ete RİA Novosti.
«Devlet akimiyeti organlarınıñ vekilleri, Rusiye Arbiy quvetleri ve FSB arbiyleri, yarımadanıñ naqliyat ve energetika infrastruktura obyektlerine qarşı diversion-terroristik areketlerniñ yapılması içün... qurulğan Ukrayına mahsus hızmetleriniñ terenden gizli casus ağınıñ faaliyeti toqtatıldı», – dep aytıla haberde.
Rusiye uquq qoruyıcıları bildirgenine köre, tutulğanlarnıñ maqsadı Qırımnıñ Rusiye yolbaşçısı Sergey Aksenov, Kreml kontrolindeki Qırım parlamentiniñ reisi Vladimir Konstantinov ve Yaltanıñ Rusiye şeer yolbaşçısı Yanina Pavlenko edi.
Muarririyet Rusiye tarafınıñ malümatını teşkerip ya da tasdıqlap olamay.
Oktâbr ayında Rusiye FSBsi Rusiye tarafdarı siyasetçi ve Ukrayınanıñ sabıq halq deputatı Oleg Tsarevge qarşı «suiqast koordinatorı» olğan Yalta sakini tutuldı, dep bildirgen edi.
Dekabr ayında ise Ukrayınada devlet hainliginde qabaatlanğan sabıq deputat İlya Kiva Moskva yaqınlarında «Odintsov şeer okrugınıñ Suponevo köyünde köttec şeerçiklerinden birinde parkta» ölü tapıldı. Rusiye Tahqiqat komitetiniñ malümatına köre, kimligi belli olmağan kişi silâdan ateş etti. Azatlıq Radiosınıñ uquq qoruyıcı organlarında olğan menbası onıñ öldürilüvi Ukrayına telükesizlik hızmetiniñ mahsus operatsiyası ola, dep bildirdi.
Tsarev Ukrayına mahsus hızmetleri içün meraqlı olğan şahıslar cedveli bar, dep aytqan edi. Ukrayına Mudafaa nazirliginiñ Baş istihbarat idaresi bu malümatnı tasdıqlamadı, amma inkâr da etmedi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
