Qırım ve esas Ukraina arasındaki memuriy sıñırda Rusiye uquq qoruyıcıları tarafından «subet» içün tutulğan Lemmar Yunusov, Mustafa Asaba ve Nariman Celâl çıqarılıp yiberildi. Bu aqta Qırımtatar Milliy Qurultayı Merkeziy saylav komissiyasınıñ reisi Zair Smedlâyev Qırım.Aqiqatqa bildirdi.
«Er kesni çıqarıp yiberdiler. Olarğa standart sualler berildi: Kim? Qayda? Ne içün?. Kene ananeviy qorquzuv aktsiyası», – dedi Smedlâyev.
Bundan evel noyabrniñ 15-nde Smedlâyev Qırım ve esas Ukraina arasındaki memuriy sıñırda Rusiye uquq qoruyıcıları qırımtatar faalleri Lenora Dülber ve Nariman Celâlnı, Qurultay delegatı Lemmar Yunusovnı ve sabıq Qurultay delegatı Mustafa Asabanı tuttı, dep bildirgen edi. Daa soñra Lenora Dülber yiberilgen edi.
Rusiye küç hızmetleri bunı izaatlamay.
2014 senesiniñ başında Qırım Rusiye tarafından ilhaq etilgen soñ Ukrainanıñ qıtadaki qısmı ile yarımada arasında şeklen memuriy, lâkin kerçekte aqiqiy olğan sıñır keçti. Herson vilâyetinde Qırım ile memuriy sıñırda üç kiriş/çıqış kontrol noqtası çalışa – «Kalançak», «Çonğar» ve «Çaplınka».
