Rusiyeli milliarder, «Alfa-bank» qurucısı Mihail Fridman Ukraina ile cenk başlağanından ve oña qarşı sanktsiyalar kirsetilgeninden berli ilk sefer Bloomberg Businessweek neşirine intervyü berdi.
Fridman Rusiye iş adamlarına qarşı ğarbiy sıñırlavlarnı mantıqsız dep adlandırdı. Oligarhnıñ fikirince, Avropa, iş adamlarınıñ Rusiye prezidenti Vladimir Putinniñ Ukrainada cenk areketlerini başlatmaq qararına tesir ete bilecegini tüşüngeni yañlış ola.
Neşir, Fridman «hucur alğa» oğradı, dep yaza. Sanktsiyalar kirsetilgeniniñ ertesi künü Londonda yaşağan milliarder bank kartı çalışmağanını kördi. Esapları blok etilgen soñ Fridman paranı qullanuv iznini almaq içün Britaniya ükümetine muracaat etmeli. London milliarderniñ eki buçuq biñ funtlıq masraflarını sıñırlaması mümkün, dep qayd ete Bloomberg Businessweek.
Fridmannıñ aytqanına köre, o, kiçik masraflar meselesini, hususan temizlikçi hızmeti meselesini bile al etmege tırışa. Rusiye iş adamı böyle meselelerniñ çezilüvini beklemedi, dep ayttı.
Fridmannıñ İsrail vatandaşlığı bar, amma anda evi yoq. İş adamı onı satın alamay, çünki esapları blok etildi. Milliarderniñ qayd etkenine köre, bu problemler Ukrainada olğanlarğa baqqanda «iç bir şeydir», dep qayd etti.
Bundan ğayrı, Fridman, ğarbiy şirketlernen olğan ortaqlığı sayesinde sanktsiyalardan qorunmağa ümüt etken edi, amma olmadı. «Yaşamağa nasıl devam etecem bilmeyim», – dep bildire milliarderniñ aytqanlarını Bloomberg Businessweek.
Ukrainağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Mesken rayonlarğa top, çoqlu ateş sistemaları ve ballistik raketalar vastasınen ateş açıla. Rusiye ordusınıñ zırhlı tehnikası Kyiv ve Rusiye sıñırına yaqın bir qaç vilâyet merkezini sarıp almağa tırışa.
Rusiye Ukrainağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1lynpf6ndesae.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
