Bıltır işğal altındaki Qırım yarımadasını Kyiv ile añlaşmayıp ve Ukraina devlet sıñırlarını bozıp ziyaret etken Frenkistan siyasetçileri, hususan Avropa Parlamentiniñ Frenkistan deputatları Virjini Joron, Filipp Olivye ve Jan-Lin Lakapel olarğa qarşı kirsetilgen sanktsiyalarnı «qanunsız» dep saya, dep bildire.
«Deputatlar Virjini Joron, Filipp Olivye ve Jan-Lin Lakapel mandatları çerçivesinde areket etken parlament vekillerine qarşı basqı ile aynı olğan sakntsiyalarğa qarşı itiraz bildire. Parlament vekilleriniñ oğraşqan vaziyetlerinen bağlı fikirlerini serbest şekillendirmek aqqı er bir demokratik parlamentniñ müim printsipi ola. Bu er alda deputatlarnıñ serbest areket etmesini ve er angi zorlavdan vazgeçmesini talap ete», – dep aytıla «Kimlik ve demokratiya» gruppasınıñ Frenkistan eyyetiniñ saytında derc etilgen beyanatta.
Qayd etilgenine köre, mezkür siyasetçiler ve 2015 senesinden berli sanktsiyalar altında olğan «Frenkistan-Rusiye dialogı» birliginiñ reisdeşi Tyerri Mariani «vekâletlerini yerine ketirmeleri içün kerek olğan printsipniñ bozulğanı sebebinden» Avropa parlamentiniñ prezidentine muracaat etecekler.
Hatırlatamız, martnıñ 24-nde Ukraina prezidenti Volodımır Zelenskıy Milliy telükesizlik şurasınıñ 26 çetel vatandaşı ve 81 şirketke qarşı sanktsiyalar kirsetilecegine dair qararını işke tüşürecek buyruqnı imzaladı.
Şahsiy sanktsiyalar aktivlerni blok etecek, vizalarnı lâğu etecek ve Ukrainağa kirişini 3 yılğa yasaqlaycaq.
«Halqa areketi birligi» firqasından Tyeri Mariani reberliginde 10 Frenkistan deputatından ibaret gruppa 2015 senesi iyülniñ 23-24-nde ziyaret etken edi. Bu meselede Ukrainanen añlaşmağan, Frenkistan Tış işler nazirligi ise ziyaretke qarşı çıqqan edi.
Qırım Muhtar Cumhuriyetiniñ prokuraturası 2016 senesi bildirgenine köre, çetel siyasetçileriniñ Qırım ziyaretiniñ qanunğa uyğun olıp olmağanı tahqiq etilmekte.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
Qırım işğalinden soñ Ukraina yarımadanıñ bütün halqara keçiş noqtalarını qapattı. Qırımğa qanunğa köre kirmek içün Herson vilâyetiniñ memuriy sıñırındaki keçiş noqtalarını qullanmaq kerek. Bu qaideni bozğan insanlar sürgün etilecek ve para cezasını alacaq.
Ukraina Tış işler nazirligi 2016 senesi iyül ayında muracaat derc etip, çetel vatandaşlarını ve vatandaşlığı olmağan şahıslarnı qanunsız Qırım ziyaretleri aqqında tenbiledi.
Ukraina müessisesi, çetel siyasetçileriniñ Qırım ziyaretleri resmiy olamaz, dep qayd ete.
Çetel artistleri ve diger medeniyet erbapları Rusiye işğal etken Qırımğa Ukraina qapatqan keçiş noqtalarından kirip, Ukraina qanunlarını boza. Qırımğa gastrollerge kelgen ya da Qırımnıñ Rusiye işğaline qoltutqan bazı artist ve yırcılarğa esas Ukrainada çıqışta bulunmağa yasaq ettiler.
Yarımadanıñ Rusiye akimiyeti çetel vatandaşlarını Qırımğa davet etip, ilhaqını qanunlaştırmağa tırışa.
