Bir kün evel derc etilgen Ukrainada Frenkistan elçiliginiñ beyanatında, Frenkistan, Ukraina bütünliginiñ tiklenmesiniñ evelkisi kibi tarafdarı olğanını bildirdi.
“Frenkistan Qırımnıñ qanunsız ilhaqını qabul etmey ve etmeycek: sıñırlarnıñ küç ile deñiştirilmesi halqara uquqqa qarşı kele. Frenkistan, Rusiye tarafından yarımadanıñ askerleştirüvi ve Keriç boğazında ve Azaq deñizinde kerginlikevelkisi kibi raatsızlay”, - denile beyanatta.
Bundan ğayrı, elçilikte, Frenkistan ileride de zapt etilgen 24 ukrain deñizciniñ azat etilmesini talap etecegini qayd ettiler. Ve Qırımda insan aqları alınen raatsız olğanını bildirdiler.
“Frenkistan Qırımda insan aqlarınınıñ, hususan qırımtatarlarnıñ, alı fenalaşqanını yazıqsına. O milliy ve diniy diskriminatsiyasını tenqit ete, bundan ğayrı Qırımnıñ tarihiy ve medeniy asabalığınıñ saqlanmasına çağırta”, - dep bildirdiler elçilikte.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
