Freedom House halqara aq qorçalayıcı teşkilâtı Rusiyeni apiste tutqan 88 ukrain ve qırımtatarını azat etmesine çağırdı. Bu aqta teşkilâtnıñ Facebook haberinde aytıla.
«Ukraina ve Rusiye arasında tutulğan şahıslarnı deñişim – bu ipratıcı zıddiyetniñ insan qurbanlarınıñ sayısını eksiltmek içün müim bir adım. Faqat 80-den ziyade ukrainalı siyasiy mabüs, şu cümleden onlarnen qırımtatar faali, Rusiyede apiste qalğanı içün adaletniñ ğayrıdan tiklenmesi alâ daa hayal kibi körüne. Rusiye ve Donbas ve Qırımda yardım etken küçleri siyasiy mabüslerni acele azat etip, sahte davalar boyunca qabaatlanğan vatandaş faalleri, jurnalist, islâm dinini kütkenlerniñ siyasiy taqibini toqtatmalı», – dep bildirdi Avropa ve Avrasiyadaki Freedom House programmalarınıñ müdiri Mark Berendt.
Onıñ aytqanına köre, mabüslerni deñişim «azatlıqta olğanlarnıñ ayatı içün pek büyük emiyet taşımaqta».
«Faqat bu deñişim memleketlerniñ insan aqları ve uquq üstünligi saalarındaki eki taraflama mecburiyetleriniñ ğayrıdan tiklenmesine yardım etse, büyük tesiri ola bile», – dep aytıla teşkilâtnıñ beyanatında.
Sentâbrniñ 7-nde deñişim çerçivesinde rusiyeliler tutqan 35 ukrainalı Ukrainağa qayttı, Rusiyege Ukrainada çeşit cinayetlerde, şu cümleden Vatanğa hainlik yapqanında qabaatlanğan 35 Rusiye ve Ukraina vatandaşı teslim etildi.
Ukraina prezidenti Volodımır Zelenskıy ukrainalılarnı ava limanında qarşıladı. O, Qırım.Aqiqatqa izaat berip, Rusiyede apiste tutulğan qırımtatar faalleriniñ azat etilüvi Ukraina-Rusiye almaşuvınıñ ekinci basamağı olacaq.
