Freedom House Amerika ükümetten tış teşkilâtı dünyada söz serbestliginiñ vaziyetine dair maruzasını derc etti, dep haber ete «Nastoyaşçeye vremâ» telekanalı.
Maruza müellifleriniñ qayd etkenine köre, avtoritar rejimlerde başqa fikirlernen küreşniñ yañı usulları peyda ola.
Rusiye aqqında aytılsa, akimiyetniñ Telegram messencerini blok etmek ıntıluvları tenqit etilmekte.
Akimiyet «tirenüv seslerini bastırmağa devam ete, çünki kütleviy haber vastalarında olarnıñ ükümdarlığını bozmaq ıntıluvı bozuvlarnı aydınlata bile». Rusiyelilerniñ tek dörtte biri jurnalistlerge inana, bu da vaziyetni daa beter yapa, dep qayd ete Freedom House.
Maruzanıñ Bir qısmı Qıtay akimiyetiniñ siyasetine bağışlana. Teşkilât vekilleriniñ fikirince, QHC dünya informatsion kampaniyası vastasınen memleket aqqında fikirlerni eyiliştirmege tırışa. İşbu kampaniyanıñ maqsadı QHC Sintszân-Uyğur muhtar rayonında insan aqları bozulmağanı aqqında yañlış malümat bermekten ibaret.
Freedom House dünyada söz serbestliginiñ vaziyeti tek avtoritar rejimlerde degil, demokratiyalarda da fenalaşa, dep bildire. Ekspertler Macaristan ve Sırbistan aqqında ayta, anda akimiyet muhalifet medialarınıñ faaliyeti çeşit manaçıqlarnen sıñırlana.
Freedom Housenı ABDdeki vaziyet de, hususan prezident Donald Trumpnıñ kütleviy haber vastalarınen subet şekilleri qasevetlendire. ABD Anayasası jurnalistlerge küçlü mustaqillik kefaletlerini bere, amma prezidentniñ aytqanları vatandaşlarnıñ mediağa olğan itibarını tüşüre, dep tüşüne teşkilât.
