Zaporojjâ şeerinde keçken künü yüz bergen Rusiyeniñ ücüminde zarar körgenlerniñ sayısı arttı, dep bildirdi vilâyetniñ arbiy memuriyetiniñ reisi İvan Födorov.
"Zaporojjâğa duşmannıñ endirgen darbesinde 26 yaralanğan. 12 insan hastahanelerde qala. Dört adamnıñ alı ağır", — dep qayd etti memur.
Födorovnıñ malümatına köre, üç bala ekimlerniñ nezareti altında qala — yımşaq yaraları olğan 11 yaşında oğlançıq, yüzü yaralanğan dört yaşında qızçıq ve qarnı yaralanğan dört aylıq qızçıq.
Daa soñra vilâyet yolbaşçısı qoştı ki, keçken künü Rusiye ateş açqanı yüksek voltlı ağlardan birisini bozdı.
Dekabrniñ 6-nda aqşam Rusiye ordusı Zaporojjâğa ücüm etti, neticede on insan elâk oldı.
Rusiye arbiyleri muntazam sürette çeşit silâ çeşitleri ile ukrayin regionlarına ücüm ete.
Rusiye yolbaşçılığı, Rusiye ordusınıñ, büyük cenk vaqtında, Ukrayina şeerleri ve köyleriniñ grajdan infrastrukturalarına maqsatlı darbeler endirgenini, vatandaş ealisini öldürgenini ve hastahaneler, mektepler, bala bağçaları, energetika ve suv teminlevi obyektlerini yoq etkenini red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıdı ve olarnıñ maqsatlı olğanını qayd ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
