Finlândiya Tış işler naziri Pekka Haavisto memleketniñ NATOğa qoşuluv vesiqasını imzaladı, dep bildirdi bu memleketniñ İttifaqtaki missiyası.
Brüsselde, İttifaqnıñ merkeziy ofisinde, bugün Fin bayrağı köterilecek.
Finlândiya NATOğa qoşulğan 31-inci memleket oldı.
Türkiye parlamenti martnıñ 30-nda Finlândiyanıñ NATOğa qoşuluv arizasını tasdıqlap, memleketniñ İttifaqqa qoşulması içün soñki manianı lâğu etti. Bir qaç kün evelsi Macaristan parlamenti de Helsinkiniñ qoşulacağını tasdıqladı.
Helsinki bitaraf qalğan edi. İttifaqqa qoşuluv arizası Rusiyeniñ Ukrayınağa qarşı tam silâlı istilâsından soñ bıltır mayısta berildi. Fin akimiyeti qayd etkenine köre, telükesizlik ceetinden baqıldı, çünki memleketniñ Rusiye ile sıñırı 1300 kilometrden çoq ola.
Finlândiya NATOğa qoşulğan soñ ittifaqnıñ aza memleketleriniñ Rusiye ile umumiy sıñırı şimdiki 1215 kilometrge baqqanda eki qat ziyade oldı.
Rusiye Tış işler nazirligi Moskva Helsinkiniñ İttifaqqa qoşuluvına cevap berip, «em arbiy-tehnik, em diger tedbirler» alacaq, dep bildirdi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
