Finlandiya yazıcısı, jurnalisti ve vesiqacı Elina Hirvonen Rusiye apishanelerinde tutulğan bir sıra ağır hastalıqları olğan Qırımtatar Tofik Abdulgaziyevni acele azat etmege çağırdı. Bu aqta Hirvonen Facebook saifesinde yazdı.
Onıñ aytqanına köre, İlk küzniñ 3-nde keçirilgen mahkeme oturışuvından soñ Abdulgaziyevni bir kün devamında aşsız ve suvsuz apis vagonında tutqankar, oña acele yardım çağırılmağan, amma, Hırvonenniñ tahminlerine köre, o, mikroinsult keçirgen ola bile.
Yazıcı halqara toplulıqnı Kremlge Rusiye tarafından tutulğan siyasiy mabüslerni ve vatandaş mabüslerini azat etmesi içün basqını quvetleştirmege çağırdı. Onıñ aytqanına köre, 16 biñden ziyade insan aqqında söz yürsetile, olardan çoqusı izolâsiyada buluna.
Onıñ qayd etkenine köre, o, yaz aylarından berli siyasiy mabüsler içün ögretme programması çerçivesinde Abdulgaziyevniñ mentorı ola.
Hatırlatamız, Tofik Abdulgaziyev 2019 senesi Sabannıñ 27-nde işğal etilgen Qırımda Rusiye Federatsiyasında yasaqlanğan, amma dünyanıñ diger memleketlerinde izin berilgen "Hizb ut-Tahrir" diniy teşkilâtında iştirak etkeninde qabaatlanıp tutuldı.
2022 senesi Quralayda Rostov-na-Donu Cenübiy okrugınıñ arbiy mahkemesi Abdulgaziyevni 12 yıl sert rejimli koloniyada qalmasına üküm etti. İlk beş yılını apishanede keçirmek kerek. Bir yıl soñra, 2023 senesi Quralayda, Vlasiha şeerindeki İstinaf arbiy mahkemesi birinci instantsiya mahkemesiniñ qararını deñiştirmedi.
2023 senesi Oraqta Tofik Abdulgaziyev Rusiye Federatsiyasınıñ Çelâbinsk vilâyetindeki Verhneuralsk apishanesine etap etildi.