Ukrainanıñ Qırımda Rusiye tarafından insan aqlarınıñ bozulğanınen bağlı Rusiyege qarşı davası fevralniñ 27-nde Avropa insan aqları mahkemesinde baqılacaq, dep bildirdi Ukraina adliye naziri Pavlo Petrenko Facebooktaki saifesinde.
Onıñ hatırlatqanına köre, işğal etilgen Qırımda ve Kyiv kontrol etmegen Donetsk ve Lugansk vilâyetleriniñ topraqlarında insan aqlarınıñ Rusiye tarafından bozulğanınen bağlı ilk davalar Avropa insan aqları mahkemesine 2014-2015 seneleri berilgen edi.
2018 senesi Ukraina daa eki dava açtırdı: siyasiy mabüsler aqlarınıñ bozuluvı ve Qırım yalısında Rusiye FSBsi tarafından zapt etilgen ukrainalı askerler aqqında.
Avropa insan aqları mahkemesinde Ukrainanıñ Rusiyege qarşı açtırğan beş davası bar.
2018 senesi avgustnıñ 10-nda Ukraina Avropa insan aqları mahkemesine Kremlniñ ukrainalı siyasiy mabüslerinen bağlı yañı devletlerara şikâyet berdi.
2018 senesi noyabrniñ 30-nda Avropa insan aqları mahkemesi Ukraina ükümetiniñ Rusiye tarafından zapt etilgen deñizcilerniñ aqlarını qorçalav beyanatına cevap olaraq Moskvanı olar aqqında malümat bermege mecbur etti. O künü Rusiye Adliye nazirligi, cevap dekabrniñ 3-ne qadar degil de, «kelişken bir müddette», «Rusiye organları» malümat alğanda mahkemege berilecek, dep bildirdi.
Avropa insan aqları mahkemesinde Rusiye tarafından zapt etilgen Qırım ve Donbastaki adise-vaqialarnen bağlı vatandaşlarnıñ dört biñge yaqın davası mevcut.
Avropa parlamenti Rusiyeni qanunsız tutulğan, apiske alınğan ukrainalı siyasiy reinelerni acele azat etmesine çağırdı.
