Fevral ayında Qırımda Kreml kontrolindeki mahkemeler Rusiye ordusında askerlik yapmaktan vazgeçkenlerge qarşı yedi yañı üküm çıqardı. Bu aqta Qırım aq qorçalayıcı gruppası bildire.
«2019 senesi fevral ayında Qırımdaki «mahkemeler» Rusiye Federatsiyası Ceza kodeksiniñ 328-inci maddesine istinaden Qırım sakinlerine qarşı açılğan eñ azından 7 cinaiy iş boyunca üküm çıqardı. Umumen işğal başlağanından berli Qırım mahkemeleriniñ saytlarında Rusiye Federatsiyasınıñ silâlı quvetlerinde askerlik yapmaqtan vazgeçken qırımlılarğa qarşı açılğan eñ azından 52 cinaiy iş aqqında malümat derc etildi», – dep aytıla haberde.
Bu cinaiy madde boyunca qırımlılar 200 biñ rublege qadar (82 biñ ğrıvnâ – QA) para cezası, 2 yılğa qadar mecburiy işler ya 6 ayğa qadar apis cezası, ya da 2 yılğa qadar azatlıqtan marum etüvge üküm etile bile.
Aq qorçalayıcılarnıñ bildirgenine köre, Kreml kontrolindeki Curçı (Pervomayskiy) rayon mahkemesi 2018 senesi «Rusiye ordusında askerlik yapmaqtan vazgeçüv» içün dört üküm çıqardı. Bütün davalarnı qadı Anna Klimova baqtı. Curçı rayonınıñ eñ azından eki sakinine 6 ve 7 biñ ğrıvnâğa qadar para cezasını berdi, dep bildire aq qorçalayıcılar.
Qırımlılarğa çıqarılğan ükümlerniñ esas qısmı – 5 biñden 80 biñ rublege qadar (2 biñden 33 biñ ğrıvnâğa qadar – QA) para cezaları.
Aynı vaqıtta, borc tölemesi insannı silâlı quvetlerde hızmet etmekten boşatmay.
Eñ azından bir üküm – 8 ayğa qadar şartlı apis cezasıdır.
Kyiv Rusiyeden işğal etilgen Qırım sakinlerini silâlı quvetlerine çağıruvını toqtatmasını talap ete.
QMC prokuraturası qırımlılarnı Rusiye ordusında hızmet etüv içün celpname alğanda telefon ya da elektron poçta vastasınen muracaat etmege rica ete.
Ukrainadaki BM insan aqları monitoring missiyası bildirgenine köre, 2017 senesi eñ az 4800 Qırım sakini Rusiye silâlı quvetlerine çağırıldı.
OSCE ABD işleri vaqtınca vekâletlisi Garri Kamiannıñ malümatına köre, 2018 senesi 5600 qırımlı Rusiye ordusına çağırıldı.
Qırım aq qorçalayıcı gruppasınıñ malümatına köre, Rusiyeniñ Qırım işğali başlağanından berli Rusiye 15 biñ qırımlını askerlikke çağırdı.
