2019 senesi fevral ayında Qırım ve Herson vilâyeti arasında memuriy sıñırdan keçken vatandaşlarnıñ sayısı eksildi. Bu aqta Vaqtınca işğal etilgen topraqlar ve memleket içinde köçürilgen insanlarnıñ meseleleri Nazirligi bildire.
Nazirlikniñ malümatına köre, fevral ayında memuriy sıñırdan 121 030 insan ve 20 206 naqliyat vastası keçti.
«Yanvar ayınen qıyaslansa, keçken vatandaşlarnıñ sayısı 13,94%-ğa, naqliyat vastasınen keçüvlerniñ sayısı ise 7,57%-ğa eksildi», – dep aytıla haberde.
Daa evel 2019 senesi yanvar ayında dekabr ayına baqılğanda Qırım ve esas Ukraina arasında yolcularnıñ sayısı 17%-ğa arttı, dep haber etilgen edi.
Ukraina Devlet sıñır hızmetiniñ malümatına köre, 2019 senesi yanvar ayında 2018 senesi yanvar ayına baqılğanda memuriy sıñırdaki keçiş noqtalarından eki tarafqa da 10% az vatandaş keçti.
2014 senesiniñ başında Qırım Rusiye tarafından ilhaq etilgen soñ Ukrainanıñ qıtadaki qısmı ile yarımada arasında şeklen memuriy, lâkin kerçekte aqiqiy olğan sıñır keçti. Herson vilâyetinde Qırım ile memuriy sıñırda üç kiriş/çıqış kontrol noqtası çalışa – «Kalançak», «Çonğar» ve «Çaplınka».
