Rusiye Tahqiqat komiteti, işğal etilgen Qırımda 2014 senesi fevralniñ 26-sınıñ adise-vaqiaları içün Qırımtatar Milliy Meclisiniñ reis muavini Ahtem Çiygoznı taqip etken Rusiye tahqiqatçılarına qarşı dava açıluvı sebebinden Ukraina Milliy politsiyası ve prokuraturasına qarşı cinaiy davalar açıldı, dep bildire.
Bu aqta martnıñ 2-nde saba Rusiye Tahqiqat komitetiniñ matbuat hızmeti bildire.
Müessise, Rusiye tahqiqatçılarına qarşı cinaiy taqipni «qanunsız» dep adlandırdı.
«Çiygoznıñ qayd etilgen cinayetlerine baqmadan, 2020 senesi fevral ayında Hersondaki Ukraina Milliy politsiyası ve Qırım Muhtar Cumhuriyetiniñ prokuratura hadimleri bu şahısqa qarşı ilk tahqiqat kerçekleştirgen qabaatsız üç Rusiye vatandaşınıñ taqip etilüvini başlattı», – dep aytıla haberde.
Rusiye Tahqiqat komiteti, Ukraina uquq qoruyıcı organlarınıñ hadimlerine qarşı Rusiye Ceza kodeksiniñ 299 maddesiniñ 2-nci qısmına istinaden (qabaatsız insanlarnıñ cinaiy mesüliyetke qanunsız çekilmesi) dava açtı.
«Al-azırda Ükriana uquq qoruyıcı organları hadimleriniñ cinayetke alâqası olğanını isbatlamaq içün deliller toplana», – dep qoştı Rusiye müessisesi.
Ukraina uquq qoruyıcıları şimdilik cevap bermedi.
Keçken afta Qırım Muhtar Cumhuriyetiniñ prokuraturası, Qırımtatar Milliy Meclisiniñ reis muavini Ahtem Çiygoznı 2014 senesi fevralniñ 26-nda Qırım Yuqarı Şurasınıñ binası ögünde qalabalıqlarnı teşkil etkeninde qabaatlap taqip etken 25 şahısqa şübheli olğanını bildirdi.
Daa evel Qırım Muhtar Cumhuriyetiniñ prokuraturası «fevral 26 davası» çerçivesinde üküm çıqarğan Rusiye kontrolindeki Qırım mahkemeleriniñ on qadısına şübheli olğanını haber etti.
2014 senesi fevralniñ 26-nda Qırım parlamentiniñ binası ögünde Ukraina topraq bütünliginiñ tarafdarları ve duşmanlarınıñ büyük mitingi olıp keçti. Qırımtatar ve Ukraina tarafdarı faallerine qarşı Rusiye tarafdarı faaller çıqtı.
2015 senesi yanvar ayında Rusiye Tahqiqat komitetiniñ Qırım idaresi fevralniñ 26-nda mitingde olğan qalabalıqlar aqqında cinaiy dava açtı.
Ukraina topraq bütünligine qoltutqanlar tutuldı: Qırımtatar Milliy Meclisiniñ reis muavini Ahtem Çiygoz, faaller Ali Asanov, Mustafa Degermenci, Eskender Kantemirov, Talât Yunusov, Eskender Emirvaliyev, Arsen Yunusov ve Eskender Nebiyev.
Daa soñra mahkeme «fevral 26 davasını» ekige böldi: o vaqıt Qırımda Meclis lideriniñ rolüni alğan baş şübheli Ahtem Çiygoz ayrı esnasqa alındı.
Advokat Cemil Temişevniñ teşebbüsinen faal Talât Yunusov ve ATR telekanalınıñ operatorı Eskender Nebiyev tahqiqatnen işbirligi yapıp, olarnıñ ifadeleri «fevral 26 davası» diger mabüsleriniñ davalarında delil olmaycaq şartınen qabaatlarını tanıdı. 2015 senesi dekabr ayında Talât Yunusov 3,5 yılğa, Eskender Nebiyev eki yılğa şartlı olaraq üküm etildi.
2017 senesi sentâbrniñ 11-nde Rusiye mahkemesi yarımadanıñ Rusiye işğalinen bağlı narazılıqlarnı «qalabalıqlar» dep adlandırıp, Çiygoznı olarnı teşkil etkeninde qabaatladı ve sekiz yıl sert rejimli koloniyada qalmasına üküm etti. 2017 senesi oktâbrniñ 25-nde Rusiye akimiyeti Qırımda mahküm etilgen Ahtem Çiygoznı azat etip, onı Türkiyege teslim etti. Daa soñra o, Kyivge keldi.
2018 senesi iyünniñ 19-nda Kreml kontrolindeki Aqmescitniñ Merkeziy rayon mahkemesi «fevral 26 davasınıñ» mabüslerine şartlı apis cezalarını berdi. Ali Asanov ve Mustafa Degermenci 4 yıl ve 6 ay, Arsen Yunusov ve Eskender Kantemirov 4 yıl, Eskender Emirvaliyev 3 yıl ve 6 ayğa şartlı olaraq üküm etildi, er birine 3 yıl sınav müddeti berildi.
2020 senesi fevralniñ 4-nde sınav müddeti bitmegen «fevral 26 davasınıñ» mabüsi Mustafa Degermencige qarşı cinaiy mahkümiyetniñ lâğu etilgeni belli oldı.
