Qırım özenleriniñ suv seviyesi 0,5-1,5 metrge köterile bile. Bu aqta yarımadanıñ Rusiye Fevqulâde vaziyetler nazirliginiñ matbuat hızmeti haber etti.
«Qırımnıñ gidrometeorologiya ve tabiat monitoringi idaresiniñ malümatına köre, iyülniñ 15-nde künniñ soñunda ve iyülniñ 16-nda kün devamında Qırımnıñ ayrı özenlerinde suv seviyesiniñ 0,5-1,5 metrge köterilmesi beklenile», – dep bildirdi Fevqulâde vaziyetler nazirligi.
Sinoptiklerniñ haber etkenine köre, salı künü, iyülniñ 16-nda, yarımadada ğarbiy yel süratı 7-12 metr, bazı yerlerde saniyede 15 metr olacaq. Gece ava arareti 12-17, kündüz 22-27 derece olacaq. Bazı yerlerde sağanaq, boranlı yağmur, iri burçaq yağması, saniyede 20-25 metr süratlı yel esmesi beklenile.
