Felemenk Yuqarı mahkemesi "Skit altını" Ukrayiağa qaytarılmaq kerek, dep qarar çıqardı. Bunıñ aqqında mahkemeniñ qararında aytıla, dep bildire NOS.
Böylece, Yuqarı mahkeme Qırım müzeyleriniñ yanvar ayında berilgen temyiz şikâyetini red etti.
Yanvarniñ 26-nda Rusiye Qırım parlamentiniñ spikeri Vladimir Konstantinov, Rusiye tarafından işğal etilgen Qırım müzeyleri Felemenk Yuqarı mahkemesine temyiz şikâyetini yollağanlarını bildirgen edi.
2016 senesi dekabr ayında Amsterdamnıñ Bölge mahkemesi Qırım müzeyleriniñ eksponatlarını Ukrainağa qaytarmağa qarar berdi. 2017 senesi baarde Rusiye bu qararğa itiraz bildirdi.
2019 senesi martnıñ 11-nde bu dava Amsterdamnıñ İstinaf mahkemesinde diñlenmege başladı.
500-den ziyade müzey eşyasından ibaret «Qırım: altın ve Qara deñizniñ sırları» sergisi 2014 senesi yanvarniñ 19-nda Almaniyanıñ Bonn şeerindeki Reyn ülkeşınaslıq müzeyinde keçirilgen edi. Daa soñra Amsterdamdaki Allard Pierson arheologik müzeyinde açıldı. Sergi 2014 senesi fevralniñ 7-nden avgustnıñ 31-ne qadar devam etti, faqat Rusiyeniñ Qırım işğalinden sebep Qırım müzeylerine qaytıp olamadı.
Qırımnıñ dört müzeyi eksponatlarnıñ qaytarıluvınen bağlı davanı Allard Pierson müzeyine qarşı açtırğan edi. Ukrayina akimiyeti artefaktlar müzeylerniñ mülki degil, Ukryaina devletine ait, dep bildirdi. Felemenk müzeyi qadı qararı olmağan soñ ya da taraflar añlaşqanına qadar eksponatlarnı bermemege qarar aldı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
