«On yıl evelsi Rusiye qanunsız bir şekilde Qırımnı ilhaq etti. O vaqıttan berli ne aytsalar da: Qırım – Ukrayınadır. Böyle edi ve böyle olacaq. Felemenk Ukrayına mustaqilligi, suvereniteti ve topraq bütünligine tolusınen qoltuta ve biz olarğa qoltutmağa devam etemiz. Qırım – Ukrayınadır», – dep aytıla haberde.
Felemenk mudafaa nazii Kaysa Ollongren qayd etkenine köre: Ukrayına 10 yıldan berli cenk vaziyetinde buluna.
«Felemenk ittifaqdaşlarımız kibi Ukrayınağa keregi qadar qoltutacaq», – dep yazdı o.
2014 senesi martnıñ 16-nda Qırım ve Aqyarda yarımadanıñ statusı aqqında dünya toplulığı tarafından tanılmağan «referendum» keçirildi, onıñ neticelerine köre Rusiye Qırımnı öz terkibine aldı. Ne Ukrayına, ne Avropa Birligi, ne de ABD referendumnıñ neticelerini tanımadı. Rusiye prezidenti Vladimir Putin mart 18 künü Qırımnıñ Rusiyege qoşulğanını ilân etken edi.
Halqara teşkilâtlar Qırımnıñ işğali ve ilhaqını qanunsız tanıp, Rusiye areketlerini takbih etti. Ğarp memleketleri iqtisadiy sanktsiyalar kirsetti. Rusiye yarımada ilhaqını inkâr ete ve bunı «tarihiy adaletniñ ğayrıdan tiklenmesi» dep adlandıra. Ukrayına Yuqarı Radası Qırım ve Aqyarnıñ Rusiye tarafından vaqtınca işğal etilüvi 2014 senesi fevralniñ 20-nde başladı, dep ilân etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
