Aqyarda Rusiye uquq qoruyıcıları 22 yaşında Farhad Soliyevniñ bulunğan yerini taptı, lâkin aydınlatmağa razı olmadı. Bu aqta «Qırım birdemligi» Rusiye İç işler nazirliginiñ bölük yolbaşçısı Aleksandr Perepelitsanıñ malümatına esaslanıp haber ete.
Mektüpte aytılğanına köre, «Farhadqa qarşı bir de bir qanunsız areketler yapılmadı». Soliyevniñ bulunğan yerine dair malümat olğan teşkerüv davasına ilâve etildi. Perepelitsa başqa bir malümat bermedi.
Noyabrniñ 16-nda «Qırım birdemligi» Aqyarda kimligi belli olmağan insanlar noyabrniñ 3-nde 22 yaşında Farhad Soliyevni hırsızladı, dep bildirdi. Anası Lenara Seydaliyeva bildirgenine köre, video kameralarından körüngeni kibi, «onı, büyük ihtimalnen, FSB hadimleri urbasında olğanlar hırsızladı».
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
