Rusiye uquq qoruyıcıları bir ay evelsi hırsızlanğan 22 yaşında Farhad Soliyevniñ bulunğan ri aqqında bilmey, dep bildirdi. Bu aqta «Qırım birdemligi» cemaat birleşmesi haber ete.
Rusiye İç işler nazirligi Tahqiqat idaresi advokat Edem Semedlâyevniñ muracaatına cevap berip, Soliyev şeerniñ nevbetçi bölüklerine alınmadı, oña qarşı cinaiy davalar açılmadı, bir de bir tahqiqat tedbirleri keçirilmedi, dep bildirdi.
Uquqçı Lilâ Gemeci aytqanına köre, hırsızlanğanından bir ay keçken soñ tek bular belli. Aq qorçalayıcılar çeşit Rusiye qurulışlarına muracaatlar yolladı – hususan Cezalarnı yerine ketirüv federal hızmeti, arbiy prokuratura, İç işler nazirligi, FSBge – lâkin Soliyevniñ bulunğan yeri aqqında cevap kelmedi.
«Bir ses yoq. Bir kere (Soliyevniñ – QA) anasına telefon etip, angi malümat alacaq olasıñız, dep sorağanlar», – dep qayd etti Gemeci. Uquqçı bu afta Rusiye uquq qoruyıcı organlarınıñ areketsizliginen bağlı dava açtıracaq, dep qoştı.
Hırsızlanğan Soliyevniñ anası Lenara Seydaliyeva tarif etkenine köre, Farhad ve 33 yaşında işdeşi Server Aliyevni Rusiye FSB maşinasınen belli olmağan yerge alıp ketkenler.
Noyabrniñ 16-nda «Qırım birdemligi» Aqyarda kimligi belli olmağan insanlar noyabrniñ 3-nde 22 yaşında Farhad Soliyevni hırsızladı, dep bildirdi. Anası Lenara Seydaliyeva bildirgenine köre, video kameralarından körüngeni kibi, «onı, büyük ihtimalnen, FSB hadimleri urbasında olğanlar hırsızladı».
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
