Ava ilâvesinde Qırım Rusiye toprağı olaraq işaretlengen Apple Amerika şirketi etrafında çıqqan qavğadan soñ içtimaiy ağlarda fleşmob başlandı.
Facebooktaki Apple saifesinde qullanıcılar #CrimeaIsUkraine ve #CrimeaIsNotRussia dep yaza.
Qırım.Aqiqat, Apple şirketi Rusiyede Qırım ve Aqyarnı «Ava» ilâvesinde «Rusiye» toprağı olaraq qayd etip başladı, dep bildirgen edi. Esas Ukrainada ve işğal altındaki yarımadada Aqyar, Aqmescit, Keriç ve diger şeerler ne Ukraina, ne de Rusiye olaraq qayd etile.
ABD Maliye nazirligi, Qırım «Rusiyege ait» kibi işaretlengeni içün Apple şirketiniñ areketleri sanktsiya rejimine oğraymı teşkermege vade ete.
Ukraina Tış işler nazirliginiñ spikeri Katerına Zelenko Qırım.Aqiqat Radiosınıñyayınında Ukraina Apple Amerika şirketi öz ilâvelerinde Qırımnı Rusiye toprağı olaraq işaretlememesini talap etecek, dep ayttı.
Apple Amerika şirketi, davalı topraqlarnı belgilev siyasetini teşkermege başladı, dep bildirdi. Şirketniñ matbuat kâtibi Trudi Müllerniñ aytqanina köre, bu Apple siyasetiniñ deñişmelerine yol aça bile.
Rusiye Devlet dumasınıñ telükesizlik ve qabarcılıq ile küreş komitetiniñ reisi Vasiliy Piskarev, «Apple, Devlet dumasınıñ Qırımnıñ işaretlenmesinen bağlı iddialarını bütünley tüzetti», dep bildirdi. Bu aqta o, şirketniñ Rusiye vekili Darya Yermolinanen körüşip ayttı.
2019 senesi mayıs ayında Apple Qırım şeerlerini em esas Ukrainada, em yarımadada öz ilâvelerinde birine ait kibi işaretlemegen edi.
