Facebook ve Twitter içtimaiy ağlarında Avropa Birliginde Rusiyeden sanktsiyalarnıñ alıp taşlanmasına qarşı online aktsiya başlatıldı. Bu aqta Save Oleg Sentsov cemiyeti bildire.
«Bu salı künü, oktâbrniñ 9-nda, Avropa Şurasınıñ Parlament Assambleyası Rusiyeden sanktsiyalarnı alıp taşlamaq içün rezolütsiyağa rey berecek. Vesiqada bu aqta bir şey aytılmay, amma er kes añlay ki, PACE reglamentine teklif etilgen deñişmeler olarnı uzatmağa imkân bermez», – dep aytıla haberde.
Aktsiya teşkilâtçılarınıñ fikirince, «bu tsinik bir şey, çünki Avropa Şurasınıñ Putinden Qırım ve Donbasta cinayetlerni toqtatmaq talaplarından iç birisi yerine ketirilmegen edi».
Haber etile ki, Facebookta belli siyasetçilerniñ yazıları altında online aktsiya çağırmağa ve resim qoymağa teklif etile. Bundan ğayrı, #SaveOlegSentsov ve #SaveCouncilEurope heştegleri qoyulmalı.
Twitterde online aktsiyağa çağırıp, resim qoymağa, siyasetçiniñ saife adını yazmağa ve yuqarıda yazılğan heşteglerni qoymağa teklif etile.
Oktâbrniñ 8-12-nde Strasburgda keçirilgen Avropa Şurası Parlament Assambleyasınıñ küz sessiyasında Ukraina eyyeti sanktsiyalarnı kirsetme imkânınıñ yoq etilmesine yol bermemege tırışacaq. Bu aqta PACEdeki Yuqarı Rada eyyetiniñ reisi, «Petro Poroşenkonıñ Bloku» fraktsiyasınıñ halq deputatı Vladimir Aryev Facebookta haber etti.
Aryevniñ bildirgenine köre, PACEde insan aqdarı, demokratiya ve uquqnı bozğan memleketlerniñ eyyetlerine qarşı sanktsiyalarnı kirsetme tedbirlerini zorlaştırmağa teklif etile.
Bu qarar 2014 senesi aprel ayında Qırım işğali sebebinden Rusiyege qarşı sanktsiyalapnı uzatma esnasını qıyınlaştıra bile. Bu qarar esasında Rusiye deputatları PACEde rey berme ve onıñ reberlik organlarında temsil olma aqqından marum etildi. Rusiye eyyetine qarşı sanktsiyalar bir qaç kere uzatılğan edi, qabul etilgen qararlarda ise Assambleya Kremlni Donbastaki arbiy istilânı ve Qırım ilhaqını toqtatmağa çağırdı.
