Kremlniñ siyasiy mabüslerniñ soy-sopları birleşmesi, Lugansk vilâyetinde uruşlar vaqtında elâk olğan Qırım sakini, cemaat faali, sabıq siyasiy mabüs Gennadiy Afanasyevge ölüminden soñ Ukrayina Qaramanı unvanını bermege teklif etti.
Muvafıq muracaat Ukrayina prezidenti Ofisiniñ resmiy saytında derc etildi.
''Gennadiy başta Qırım ilhaqına qarşı Rusiye işğalcilerinen küreşken, soñra ise ukrayin siyasiy mabüsleriniñ azat etilmesi içün, soñra ise cebede er birimiz içün küreşken insandır. 767 kün Rusiye esirliginde bulunıp, Ukrayina içün küreşte elâk olğan adam'', - dep yazıla Kremlniñ siyasiy mabüslerniñ tuvğanları birleşmesiniñ Facebook saifesinde.
2022 senesi dekabr ayınıñ soñunda belli oldı ki, Lugansk vilâyetinde qırımlı, vatandaş faali, sabıq siyasiy mabüs Gennadiy Afanasyev (Tor) elâk oldı. O, Ukrayina Arbiy Silâlı quvetleriniñ 241 brigadasınıñ 130 batalyonında cenkleşti. Afanasyev, Rusiyeniñ Ukrayinağa arbiy istilâsınıñ birinci künü arbiy komissarlıqqa ketti.
Aprelniñ 11-nde belli oldı ki, Gennadiy Afanasyev III derece ukrayin "Cesürlik içün" ordeninen taqdirlendi.
Aqmescitli fotoqraf ve uquqçı Gennadiy Afanasyevniñ adı "Qırım terroristleri" davasınıñ mabüsi olğanından soñ belli oldı. 2014 senesi o, Rusiyeniñ Qırım ilhaqına qarşı çıqqan edi, bundan soñ FSB hadimleri tarafından Aqmescitte terror ücümlerini azırlağanında qabaatlanıp tutıldı. O vaqıt onıñnen beraber bu davanıñ diger mabüsleri de yaqalandı. Halqara aq qorçalayıcı teşkilâtlar bu işni siyasiy, mabüslerni ise siyasiy mabüs dep adlandırdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
