Dekabrniñ 23-nde Qırım ve Ukraina qıtası arasındaki "Kalançak" yoqlav keçitinde faaller Qırım tarafına "Siyasiy mabüslerge azatlıq" yazısınen banner uçurttılar.
Teşkilâtçılarnıñ planlaştırğanı kibi, bu banner Eski Qırım, Kefe, Ermeni Bazar, Krasnoperekopsk, Voinka, Ostrovskoye, Yarkoye, Dorojnoye, Azovskoye, Tambovka, Kurskoye, Lesnoye, Sudaq üzerinde uçmalıdır, dep haber ete Qırım.Aqiqat mühbiri.
Bannerniñ uçurtuv vaqtında Kreml tarafından Qırımda ve Rusiye topraqlarında siyasiy sebeplerden tutulğan 127 ukrain vatandaşınıñ adı oquldı. Bundan ğayrı er istegen banner üzerinde siyasiy mabüsler içün öz tileklerini yazdılar.
Sabıq siyasiy mabüs İsmail Ramazanovnıñ aytıp bergenine köre, böyle etip aktsiya iştirakçileri siyasiy mabüslerge öz destegini bildirmek isteyler ve Rusiyeden olarnıñ azat etilsini talap eteler.
Bu bannerni Kramotorskta göñülliler yaptı.
Dekabrniñ 12-nde Kyivde saat 12-de Mustaqillik meydanında halqara İnsan aqları qoruv kününe bağışlanğa «Siyasiy mabüslerge azatlıq» adlı birdemlik aktsiyası olıp keçti.
Ukraina prezidenti Volodmır Zelenskıy, Türkiye Kyivniñ azat etmege tırışqan siyasiy mabüslerniñ cedvelini Rusiye tarafına bergenini bildirdi.
Rusiye Tış işler naziri Sergey Lavrov işğal altındaki Qırımda insan aqlarınıñ bozuluvı aqqında laflar uydurıla, dep bildirgen edi. Qırımnıñ Rusiye yolbaşçısı Sergey Aksenov Qırımda siyasiy mabüsler «kesen-kes yoq», dep israr ete.
