Aqmescit, Yalta ve Kefede Ukrayınağa qoltutuv risaleleri peyda oldı, dep haber ete «Jovta striçka» Ukrayına areketi Telegram kanalında.
«Rusiye işğalci akimiyetiniñ basqısına baqmadan, «Jovta striçka» areketiniñ faalleri Aqmescit, Kefe ve Yaltada çalışmağa devam ete. 400-den çoq risale, graffiti yaptıq ve yañı sarı şeritler bayladıq, çünki sarı şerit Ukrayına vatandaş tirenüviniñ timsali ola», – dep aytıla haberde.
«Jovta striçka» Ukrayına areketi bildirgenine köre, «vaqtınca işğal etilgen Qırımda vatandaş tirenüvi quvetlerini arttıra». Teşkilât, yarımadada Ukrayına areketiniñ aman-aman 1000 faali buluna, dep qayd ete.
Qırım ve Aqyarda Rusiyeniñ Ukrayınağa qarşı istilâsına qarşı çıqqanlarnı taqip etmege devam eteler. Noyabr ayında «KrımSOS» aq qorçalayıcı teşkilâtı bildirgenine köre, 9 ay devamında Qırımdaki Rusiye mahkemeleri Rusiye ordusını «itibardan tüşürüvnen» bağlı 200-den çoq memuriy davanı baqtı.
Ukrayına prezidentiniñ Qırım Muhtar Cumhuriyetindeki daimiy temsilcisiniñ muavini Denis Çistikovnıñ soñki malümatına köre, Qırımda Rusiye Federatsiyasınıñ ordusını «itibardan tüşürüv» sebebinden 170-ten çoq insan mesüliyetke çekildi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
