Qırımda apis etilgen Qırım cemaat jurnalisti, ekinci Aqmescit "Hizb ut-Tahrir davası"nıñ iştirakçisi Rustem Şayhaliyevniñ babası - Dinar Şeyhaliyev vefat etti.
"Bir yarım ay evel 63 yaşındaki qırımtatarğa apansızdan rak diagnozını qoydılar. Onkologiya hastalığı tez ileriledi, adam 2019 senesi martta olğan oğlunıñ apsinden soñ stressni baş etip olamadı. Onıñ eñ büyük arzusı - oğlunı serbest körmek edi", - bildirdiler faaller.
"Qırım birdemligi"niñ malümatına köre, cenaze yarın olacaq.
Rustem Şeyhaliyev 2015-inci yıldan başlap Qırımdaki apis ve tintüvlerni aydınlata edi. 2019 yılda martnıñ 27-sinde onı apis ettiler. Rusiye FSB-si onı "Hizb ut-Tahrir" teşkilâtına ait olğanında şekley.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
