Bu aqta onı tahqiqat izolâtorında ziyaret etken advokat Svetlana Oleksenko «Qırım birdemligine» bildirdi.
Suleymanov doğuştan yürek problemleri ve tahikardiya sebebinden ekimlerge bir qaç kere muracaat etken edi. Ekim tek bir kere keldi, pustırnik ve glitsin teklif etti. Siyasiy mabüs ekisini de almadı. Spirtsiz ilâc bermege rica etse de, ekimler böyle ilâcları yoq, dep ayttı.
Qırımtatarı kamera dımlı, tek oktâbrniñ 16-nda qızdırıp başlağanlar, dep şikâyet etti. Yoqsa kurtkada yuqlay ediler.
Oktâbrniñ 5-nde onı bir kişilik kamerağa alğan soñ töşegi öyle de deñiştirilmedi. Onı yuvmağa çare yoq, çünki qurutacaq yer yoq, dep ayta advokat Oleksenko. Gigiyena vastalarından bir şey kerek olsa, Suleymanov tükândan alıp olamay.
Bundan ğayrı, onı gece-kündüz közeteler. Ruslan ne sebepten bir kişilik kamerağa alınğanını sorağanda SİZO hadimleri böyle cevap berdi: «Cedveldesiñ. Ketmeseñ, küç qullanırmız». Ruslan komissiyanıñ bu qararınen bağlı bir qaç muracaat yolladı. Şimdilik cevap yoq.
İçilecek suv içün musluq suvını filtrden keçirmek kerek. «Sebze ve meyva yoq», – dep qoştı advokat Svetlana Oleksenko.
Qırımtatarı anası ve ömür arqadaşına telefon etmek aqqını talap etti. Uzun körüşüvlerge izin berilmey, qısqa, bir qaç saatlıq, körüşüvler içün ise qoranta uzaqtan kelip olamay.
2019 senesi martnıñ 27-nde Qırımnıñ Aqmescit rayonındaki Bavurçı (Kamenka) qasabasında ve Mamaq (Stroganovka) köyünde qırımtatarlarnıñ evlerinde tintüvler keçirildi. Malümat çoq olğanı içün uquq qoruyıcılar 25 qırımtatar cemaat faalinden cinaiy davanı beş mabüslik beş gruppağa böldi. Aman-aman bütün tutulğanlar vatandaş jurnalisti ya da cemaat faali edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
