Qırımtatar faali Elmaz Akimova Facebook saifesinde Qırımda ana-babasınıñ evine Rusiye uquq qoruyıcıları kene keldi, dep yazdı.
«Saat 20:00-lerde qayd olğan yerime polisniñ üyken leytenantı A.Ahmedov keldi. Ana-babamdan alınğan añlatuvda Qırım Cumhuriyetindeki İç işler nazirligi Ahmedovnı «Rusiye Federatsiyasınıñ Ceza-protsessual kodeksiniñ 144-ünci maddesine istinaden cinayet haberlerini teşkerüvge esaslanıp» ve şimdi qayd olğan yerimde bulunğanımnı teşkermek içün yolladı. Angi cinayet aqqında laf kete ve bu cinayet oldımı sualine Ahmedov cinayet olmadı, dep cevap berdi», – dep yazdı Akimova.
Rusiye uquq qoruyıcıları evine ilk sefer kelmey. Yanvar ayında Akimova evine Rusiye polisiniñ kapitanı keldi, dep bildirgen edi. Faalniñ aytqanına köre, Rusiye polisi «onen subetleşmege» keldi. Bu ziyaretten bir qaç kün evelsi Elmaz advokatnıñ tevsiyesinen Qırımnı terk etti.
2022 senesi dekabr ayınıñ soñunda Elmaz Akimova Rusiye Ekstremizm ile küreş merkeziniñ hadimi ve yerli polis evini ziyaret ettiler, dep bildirdi. O vaqıt oña bir tenbi ya da saqındıruv berilmedi. Ziyareti nenen bağlı sualine «bazı insanlarnıñ yaşağan yerini teşkermek emri bar», dep cevap berdiler.
Rusiye uquq qoruyıcıları Elmaz Akimovanıñ evine ziyaretler aqqında bildirmey.
Daa evel Qırımda Rusiye uquq qoruyıcıları faal Elmaz Akimovanı «qanun bozulmaycaq» dep tenbiledi. Han Sarayı yanında keçirgen bir kişilik narazılığından soñ tutulğanı aqqında haber etilgen edi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
