Link açıqlığı

Saatnıñ esas haberi

Ukraina istihbaratınıñ yolbaşçısı faal cenk areketleri bitecek vaqıtnı tahmin etti


Kırılo Budanov
Kırılo Budanov

Rusiyeniñ Ukrainağa qarşı cenkiniñ dönüm noqtası avgustta başlanacaq ve bu yılnıñ soñunda bitecek, dep bildirdi Ukraina Mudafaa nazirliginiñ Baş istihbarat idaresiniñ yolbaşçısı Kırılo Budanov.

«Çoqusı faal cenk areketleri bu yılnıñ soñunda bitecek. Neticede bütün topraqlarımızda, Donbas ve Qırımnen beraber Ukraina akimiyetini ğayrıdan tikleycekmiz», – dedi Budanov Sky News intervyüsında, dep haber ete mayısnıñ 14-nde Ukraina istihbaratınıñ matbuat hızmeti Facebookta.

Budanov, Rusiye Federatsiyasında Rusiye prezidenti Vladimir Putinni yoq etmek maqsadınen «esnaslar başlatıldı», Rusiye lideri ise qansernen küreşe, dep ayta.

«Sekiz yıldan berli Rusiyenen cenkleşemiz. Büyük reklaması yapılğan Rusiye ordusı – bir yalandır. Bu silâsı olğan insan sürüsidir», – dep ayttı o.

Mayısnıñ 10-nda ABD Mudafaa nazirliginiñ memurı jurnalistler içün qapalı brifingde Rusiye prezidenti Vladimir Putin Ukrainağa qarşı büyük cenkniñ iç bir maqsadına irişip olamadı, dep bildirdi.

Mayısnıñ 12-nde Britaniya istihbaratı Rusiye Federatsiyası ordusınıñ Harkiv vilâyetinden çıqarıluvı Ukrainanıñ esas şeerlerini zapt etmege küçü yetmegeniniñ işareti ola, dep qayd etti.

Mayısnıñ 14-nde Büyük Britaniya işğal etilgen Hersonda olğanlarğa baqılsa, Ukrainadaki siyasiy maqsadlarına irişüvde «Rusiye istilâsınıñ muvafaqiyetsizligi» aqqında bildirdi.

Aprelniñ başında «Proyekt» Rusiye neşiriniñ tahqiqatı aydınlatıldı, anda Vladimir Putinniñ yanında 35 kere qanser hastalıqlarınıñ cerrah tedaviylevinde mütehassıs olğan ekim bar edi, dep aytıldı. Tahqiqatçılar Putinniñ bir hastalığı bar dep aytmadı.

Rusiye prezidentiniñ matbuat kâtibi Dmitriy Peskov jurnalistlerniñ Vladimir Putinniñ qanser hastalığı barmı sualine bular «uydurma ve yalan», dep ayttı.

Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.

Aprelniñ başında Moskva Ukrayina şimalinde faal olğanını toqtattı, dep bildirdi. Tezden Ukrayina akimiyeti Kıyiv, Çerniğiv ve Sumı vilâyetinde Rusiye arbiyleri qalmadı, dep ayttı.

Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.

Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.

Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net . Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.

XS
SM
MD
LG