Milliy exit poll malümatlarına köre, devlet yolbaşçısı saylavlarınıñ ekinci turında ğalebe qazanğan Ukraina prezidenti namzeti, tele alıp barıcısı ve şoumen Volodımır Zelenskıy tarafdarları ve taqımına teşekkürler bildirdi.
«Maña qoltutqan bütün ukrainalılarğa, farqlı saylav yapqan bütün ukrainalılarğa teşekkürler bildirem… İç bir vaqıt sizni ıncıtmam», – dep ayttı Zelenskıy öz ştabında exit poll malümatları aydınlatılğan soñ, dep haber ete Azatlıq Radiosı.
Saat 18:00-ğa qadar milliy exit poll malümatları belli oldı. Olarğa köre, alıp barıcı, şoumen Volodımır Zelenskıyge saylayıcılarnıñ 73,2%-ı rey berdi, şimdiki prezidenti Petro Poroşenkoğa – 25,3%. Saylayıcılarnıñ 1,5%-ı bülletenlerni bozdı.
Exit pollnıñ 20:00-ğa qadar malümatları saat 22:00-da aydınlatılmalı.
Milliy exit poll-2019 İlko Kuçeriv «Demokratik teşebbüsler» fondu, Kyiv içtimaiyat halqara institutı ve Oleksandr Razumkov Ukraina siyasiy ve iqtisadiy tedqiqatlar merkezi tarafından keçirildi.
Aprelniñ 21-nde Ukraina vatandaşları öz prezident namzetine qoltuttı. Saylav bölükleri saat 8:00-da açılıp, 20:00-da qapatıldı.
Ukraina Merkeziy saylav komissiyasınıñ saytındaki malümatqa köre, saylayıcılarnıñ 44,84%-ı Ukraina prezidenti saylavlarınıñ ekinci turında saat 15:00-ğa qadar rey berdi.
Birinci turda Volodımır Zelenskıyge 5 714 034 saylayıcı (30,24%), Petro Poroşenkoğa ise 3 014 609 (15,95%) saylayıcı qoltuttı. Rey berüvde saylayıcılarnıñ 62,8%-ı iştirak etti.
